Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 104 Hüküm no: 47 Orijinal metin no: [8a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kaya Hatun’un eşi Hasan’dan muhâlaa yoluyla boşandığı Zevc-i gayr-ı dâhili ile muhâla‘a Mahmiye-i İstanbul’da Akseki mahallesi sâkinelerinden Kaya bt. Cezbî İbrahim Efendi nâm bikr-i bâliğa tarafından husûs-ı âti’l-beyâna vekîl olduğu zât-ı mezbûreyi ârifân Molla İsmail b. Abdullah ve es-Seyyid el-Hâc Ömer b. es-Seyyid Hasan şehâdetleriyle sâbit olan Abdullah Efendi b. Abdurrahman Efendi meclis-i şer‘-i hatîr-ı lâzımü’t-tevkīrde müvekkile-i mezbûrenin zevc-i gayr-ı dâhili işbu bâ‘isü’l-kitâb Hasan Efendi b. Mehmed Efendi mahzarında bi’l-vekâle ikrâr ve takrîr-i kelâm edip mezbûr Hasan Efendi müvekkilem mezbûre Kaya’nın zevci olup kable’d-duhûl ve’l-halvet beynlerinde şikāk vâki‘ olmağla zimmetinde mütekarrer ve ma‘kūdün-aleyh yüz guruş mehr-i müeccelin lâzım gelen elli guruşu üzerine mezbûr Hasan Efendi ile muhâla‘a-i sahîha-i şer‘iyye ile bi’l-vekâle hul‘ olduğumda ol dahi ber-vech-i muharrer hul‘-i mezbûru ba‘de’l-kabûl merkūm Hasan Efendi nişân olmak üzere müvekkilem mezbûre Kaya’ya teslîm bir zümrüd yüzük ve bir sîm ayna ve bir sîm na‘leyn ve bir top hatâî ve bir sandal dîvân ile merkūm Hasan Efendi’nin hîn-i akidde masrûfu olan on beş guruşu merkūm Hasan Efendi’ye bi’l-vekâle def‘ ü teslîm eylediğimde ol dahi yedimden ahz u kabz eyledikden sonra hukūk-ı zevciyete ve hîn-i akidde tesmiye olunan iki yüz guruş mehr-i mu‘accele ve târîh-i kitâba gelince sâir beynlerinde cereyân eden hukūk-ı ma‘lûme ve mechûleye müte‘allıka âmme-i da‘vâdan merkūm Hasan Efendi’nin zimmetini bi’l-vekâle ibrâ ve ıskāt eylediğimde ol dahi kezâlik hukūk-ı zevciyete ve sâir beynlerinde cereyân eden hukūk-ı ma‘lûme ve mechûleye müte‘allıka âmme-i da‘vâdan müvekkilem mezbûre Kaya’nın zimmetini ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-ışrîn min-Zilhicceti’ş-şerîfe sene 1152. Şuhûdü’l-hâl: el-Hâc Mustafa b. Hacı Mehmed, es-Seyyid Mustafa Ruhalı, es-Seyyid Ali b. Mustafa, Molla Hüseyin du‘âcı, Solak Mustafa, el-Hâc İbrahim tâbi‘-i efendi, Ali Çelebi b. Abdullah