Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 105 Hüküm no: 48 Orijinal metin no: [8a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Ali’nin eşi Ahmed ile muhâlaa yoluyla boşandığı Muhâla‘a Mahmiye-i İstanbul’da Sultan Selim kurbünde Çukur Bostan mahallesinde sâkine olup zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Âişe bt. el-Hâc Ali nâm hatun meclis-i şer‘-i hatîr-ı lâzımü’t-tevkīrde zevc-i dâhili bâ‘isü’l-kitâb el-Hâc Ahmed b. Receb nâm kimesne mahzarında ikrâr ve takrîr-i kelâm edip mezbûr el-Hâc Ahmed zevcim olup beynimizde hüsn-i mu‘âşeretimiz olmamağla zimmetinde mütekarrer ve ma‘kūdün-aleyh iki bin beş yüz akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzere zevcim mezbûr el-Hâc Ahmed ile muhâla‘a-i sahîha-i şer‘iyye ile hul‘ olduğumda ol dahi ber-minvâl-i meşrûh hul‘-i mezkûru ba‘de’l-kabûl hukūk-ı zevciyete ve sâire müte‘allıka âmme-i da‘vâdan her birimiz âharın zimmetini ibrâ-i âmm-ı katı‘u’n-nizâ‘la ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Zilhicceti’ş-şerîfe sene 1152. Şuhûdü’l-hâl: es-Seyyid el-Hâc Ömer b. es-Seyyid Hasan, Solak Mustafa muhzır, Ahmed Çelebi b. Şa‘bân, es-Seyyid Mustafa b. es-Seyyid Hasan, Mahmud Ağa b. Abdullah