Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 110 Hüküm no: 55 Orijinal metin no: [8b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah bt. Halil’in eşi Mustafa’dan muhâlaa yoluyla boşandığı Muhâla‘a Mahmiye-i İstanbul’da Sofular mahallesinde sâkine ve zâtı ta‘rîf-i şer‘î ile mu‘arrefe olan Emetullah bt. Halil nâm hatun meclis-i şer‘-i hatîr-ı lâzımü’t-tevkīrde zevc-i dâhili işbu bâ‘isü’l-vesîka Mustafa b. Hasan mahzarında ikrâr ve takrîr-i kelâm edip mezbûr Mustafa zevcim olup beynimizde hüsn-i mu‘âşeretimiz olmamağla zimmetinde mütekarrer ve ma‘kūdün-aleyh dört bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzere zevcim mezbûr Mustafa ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-i mezbûru ba‘de’l-kabûl hukūk-ı zevciyete müte‘allıka âmme-i da‘vâdan her birimiz âharın zimmetini ibrâ-i âmm-ı katı‘u’n-nizâ‘la ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-Zilhicce sene 1152. Şuhûdü’l-hâl: el-Hâc Ahmed b. Mehmed, Süleyman Çelebi b. Mehmed, Molla Hüseyin du‘âcı, es-Seyyid Mustafa b. es-Seyyid Hasan