Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 110 Hüküm no: 56 Orijinal metin no: [9a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. İbrahim’in eşi Yakub’dan muhâlaa yoluyla boşandığı Muhâla‘a Mahmiye-i İstanbul’da Keçeciler mahallesinde sâkine Vezzânî Mustafa b. Veli ve Ali b. Abdullah ta‘rîfleriyle mu‘arrefe olan Emine bt. İbrahim nâm hatun meclis-i şer‘-i şerîf-i enverde zevc-i dâhili bâ‘isü’l-vesîka Yakub b. Mehmed mahzarında ikrâr ve takrîr-i kelâm edip mezbûr Yakub zevcim olup beynimizde hüsn-i mu‘âşeretimiz olmamağla zimmetinde mütekarrer ve ma‘kūdün-aleyh yedi bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzere zevcim mezbûr ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-i mezbûru ba‘de’l-kabûl hukūk-ı zevciyete müte‘allıka âmme-i da‘vâdan zevcim mezbûr Yakub’un zimmetini ibrâ ve ıskāt eylediğimde mezbûr Yakub dahi kezâlik hukūk-ı zevciyete müte‘allıka da‘vâdan benim ile gāib ani’l-meclis oğlum Halil b. Bektaş zimmetinde cihet-i deyn-i şer‘îden müdde‘âsı olan yirmi dört guruşa müte‘allıka âmme-i da‘vâdan oğlum gāib-i mezbûr Halil’in zimmetini ibrâ-i âmm-ı râfiü’l-hısâm ile ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Zilhicceti’ş-şerîfe li-sene isneyn ve hamsîn ve mi’e ve elf. Şuhûdü’l-hâl: Mustafa b. Veli, Ali Çelebi b. Abdullah, es-Seyyid Mustafa b. es-Seyyid Hasan, el-Hâc Mustafa b. el-Hâc Mehmed, Mehmed Çelebi b. Abdullah