Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 111 Hüküm no: 58 Orijinal metin no: [9a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Osman ile Mehmed b. Mahmud’un boşanmasından sonra aralarındaki mehir davasına sulh bedeli karşılığı son verildiği Sulh Mahmiye-i İstanbul’da Mesih Hüseyin Paşa mahallesinde sâkine olup zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Fâtıma bt. Osman nâm hatun meclis-i şer‘-i hatîr-ı lâzımü’t-tevkīrde zevc-i sâbıkı işbu bâ‘isü’l-vesîka Mehmed b. Mahmud nâm kimesne mahzarında ikrâr ve takrîr-i kelâm edip mezbûr Mehmed târîh-i kitâbdan on altı gün mukaddem beni bâyinen tatlîk etmekle zimmetinde mütekarrer ve ma‘kūdün-aleyh altı yüz akçe mehr-i müeccelim ve nafaka-i iddet-i mu‘ayyene-i ma‘lûmem ve me’ûnet-i süknâmı mezbûr Mehmed’den taleb ve da‘vâya tasaddî eylediğimde mehr-i mezkûrun ve nafaka-i iddet-i süknâsı üzerine benimle sulh olmuş idik demekle beynimizde ba‘de’l-münâza‘a beynimizde muslihûn tavassut edip da‘vâ-yı mezkûremden beni mezbûr Mehmed ile üç yüz akçe üzerine inşâ-i akd-i sulh ettiklerinde ben dahi sulh-ı mezbûru Mehmed yedinden tamâmen ahz u kabz eyledim, hukūk-ı zevciyete müte‘allıka âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Zilhicceti’ş-şerîfe sene 1152. Şuhûdü’l-hâl: Mehmed Çelebi b. İbrahim, Molla Hüseyin b. el-Hâc Mehmed du‘âcı, Halil b. Osman, Ali b. Abdullah