Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 112 Hüküm no: 59 Orijinal metin no: [9a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah’un oğlu Mehmed’e babası Mustafa’dan nafaka takdir edildiği Nafaka Mahmiye-i İstanbul’da Sofular mahallesi sâkinelerinden olup zâtı ta‘rîf-i şer‘î ile mu‘arrefe olan bâ‘isetü hâzihi’l-vesîka Emetullah bt. Halil nâm hatun meclis-i şer‘-i hatîr-ı lâzımü’t-tevkīrde zevc-i sâbıkı Mustafa b. Hasan nâm kimesne mahzarında takrîr-i kelâm ve ta‘bîr ani’l-merâm edip merkūm Mustafa’nın firâşından hâsıl ve benden mütevellid bi-hakkı’l-hıdâne hacr ve terbiyemde olan işbu sadrî sagīr oğlum Mehmed’in mâlı olmayıp nafaka ve kisveye eşedd-i ihtiyâcı olmağla sagīr-i mezbûr Mehmed’in nafaka ve kisve ve sâir levâzım-ı zarûriyesi’çün babası merkūm Mustafa üzerine kıbel-i şer‘den kadr-ı kifâye meblağ farz ve takdîr olunmak matlûbumdur dedikde gıbbe’t-tasdîkı’ş-şer‘î hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīr-i mezbûr Mehmed’in nafaka ve kisve ve sâir levâzım-ı zarûriyesi’çün babası merkūm Mustafa üzerine târîh-i kitâbdan küllü yevm bi’t-terâzi ikişer para farz ve takdîr edip meblağ-ı mefrûz-ı mezbûr ikişer parayı sagīr-i mezbûr Mehmed’in nafaka ve kisve ve sâir levâzım-ı zarûriyesine harc ü sarfa ve lede’l-iktizâ istidâneye ve vakt-i zaferde babası mezbûr Mustafa üzerine rücû‘a mezbûre Emetullah Hatun’a izin birle mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-Zilhicce sene 1152. Şuhûdü’l-hâl: el-Hâc Ahmed b. Mehmed, Süleyman Çelebi b. Mehmed, Du‘âcı Molla Hüseyin, es-Seyyid Mustafa b. es-Seyyid Hasan