Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 113 Hüküm no: 61 Orijinal metin no: [9a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha ve Emetullah’ın Halil Çelebi’ye ait evdeki hissesini ücretini ödeyerek aldıklarına dair şahitleri olduğu İsbât-ı ibrâ Mahmiye-i İstanbul’da Mollagürânî mahallesi ahâlîsinden olup bundan akdem diyâr-ı Acem’de vefât eden Mustafa Çelebi b. İsmail b. Abdullah’ın verâseti zevce-i menkûha-i metrûkesi Saliha bt. Abdullah ve sulbiye kebîre kızı Emetullah nâm hatunlara ve li-ebeveyn er karındaşları Halil Çelebi ve Ahmed Çelebi’ye münhasıra ve tashîh-i meselesi on altı sehmden olup sihâm-ı mezbûreden iki sehmi mezbûre Saliha’ya ve sekiz sehmi kızı mezbûre Emetullah ve üçer sehmi karındaşları mezbûrândan her birine isâbeti ba‘de’t-tahakkukı’ş-şer‘î mezbûr Halil Çelebi meclis-i şer‘-i şerîf-i enverde bâ‘isetü hâzihi’l-vesîka mezbûre Emetullah tarafından husûs-ı âti’l-beyânda husûmet ve redd-i cevâba vekîl olduğu zât-ı mezbûreyi ma‘rifet-i şer‘iyye ile ârifân olup mahmiye-i mezbûrede Seydi Bey mahallesi imâmı olan İbrahim Efendi ve Mustafa Efendi b. Halil şehâdetleriyle mahzar-ı hasm-ı câhidde sâbit ve sübût-ı vekâletine hükm-i şer‘î lâhık olan el-Hâc Abdurrahman b. Süleyman nâm kimesne ile zâtı şâhidân-ı mezbûrân ta‘rîfleriyle mu‘arrefe olan mezbûr Saliha mahzarında üzerlerine da‘vâ ve takrîr-i kelâm edip işbu defter-i kassâmda zikr olunan mahalle-i mezbûrda vâki‘ ma‘lûmü’l-hudûd ve’l-müştemilât bir bâb menzilin nısfı müteveffâ-yı mezbûrun ile’l-vefât yedinde mülkü olmağla ba‘de vefâtihî tashîh-i mezkûr üzere ben üç sehm hisse-i irsiye-i şer‘iyyemi bin yüz kırk üç senesi Recebi’l-ferdinin on sekizinci günü defter-i merkūmda tahmîn ve takvîm olunduğu vech üzere dört bin beş yüz akçe semen-i makbûza mezbûretân Emetullah ve Saliha’ya ale’l-iştirâk [9b] bey‘ ve teslîm etmiş idim, lâkin bey‘-i mezkûr tağrîr ve gabn-ı fâhiş olmağla suâl olunup semen-i mezkûru yedinden ahz ve hisse-i mezkûremi geri bana teslîme mezbûretâna tenbîh olunmak matlûbumdur dedikde gıbbe’s-suâl mezbûre Saliha ile vekîl-i mezbûr dahi bey‘-i mezkûru ikrâr lâkin tağrîr ve gabni inkâr eylediklerinden mâ‘adâ târîh-i mezkûrda mezbûr Halil bey‘-i mezkûrun tağrîr ve gabnine ve bi’l-cümle tereke-i mezkûreye ve kızı merkūma müte‘allıka âmme-i da‘vâdan mahzar-ı şuhûdda müşteriyatân-ı mezbûretânın zimmetlerini ibrâ-i âm ile ibrâ ve ıskāt eyledi deyü def‘le mukābele edicek müdde‘î-i mezbûr dahi def‘-i mezkûru ba‘de’l-inkâr mezbûrân Saliha ve Halil’den def‘-i mezkûrlarına beyyine taleb olundukda udûl-ı ahrâr-ı ricâl-i Müslimînden mezbûrân İbrahim Efendi ve Mustafa Efendi ile Halil b. Mustafa nâm kimesneler ile li-ecli’ş-şehâde meclis-i şer‘a hâzırûn olup istişhâd olunduklarında fi’l-hakīka mezbûr Halil menzil-i mezkûrun terekeden olan mârrü’z-zikr nısfından ber-vech-i tashîh mezkûr üç sehm hisse-i irsiye-i şer‘iyyesini târîh-i mezkûrda meblağ-ı mezbûr dört bin beş yüz akçe semen-i makbûza mezbûretân Emetullah ve Saliha’ya ale’l-iştirâki’s-seviyy bey‘ ve teslîm ve bizim huzûrumuzda bey‘-i mezkûrun tağrîr ve gabnine ve bi’l-cümle tereke-i müteveffâ-yı mezbûra ve menzil-i merkūma müte‘allıka âmme-i da‘vâdan müşteriyetân-ı mezbûretân Emetullah ve Saliha’nın zimmetlerini ibrâ-i âm ile ibrâ ve ıskāt eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettiklerinde gıbbe’t-ta‘dîl ve’t-tezkiye şehâdetleri makbûle olmağın mûcebince merkūm Halil ber-vech-i muharrer bi-gayr-ı vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-Zilhicceti’ş-şerîfe li-sene isnâ ve hamsîn ve mi’e ve elf. Şuhûdü’l-hâl: İbrahim Efendi b. Mustafa el-imâm, Mustafa Efendi b. Halil, Halil Çelebi b. Mustafa, el-Hâc Mustafa b. el-Hâc Mehmed, Salih Çelebi b. Süleyman, Mehmed Çelebi b. Abdullah