Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 114 Hüküm no: 62 Orijinal metin no: [9b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ahmed’den kalan ev ve bahçe Mustafa Ağa’ya satılmış olduğundan varislerden Hüseyin’in bu mülklerde hakkı olmadığı Mu‘ârazadan men‘ Vilâyet-i Anadolu’da İznik kazâsına tâbi‘ Dutluca nâm karyede sâkin iken bundan akdem vefât eden es-Seyyid Ahmed b. Mustafa b. Abdullah’ın verâseti zevcesi Şerife Fâtıma bt. (°) nâm hatun ile sulbî sagīr oğulları es-Seyyid Zeyneddin ve es-Seyyid Abdurrahman ve sulbiye sagīre kızı Şerife Hadîce’ye münhasıra kable’l-kısmet sagīr-i mezbûr es-Seyyid Zeyneddin dahi vefât edip verâseti vâlidesi mezbûre Şerife Fâtıma li-ebeveyn er karındaşı mezbûr es-Seyyid Abdurrahman ve kız karındaşı mezbûre Şerife Hadîce’ye münhasıra kable’l-kısmet sagīr-i mezbûr es-Seyyid Abdurrahman dahi vefât edip verâseti vâlidesi mezbûre Şerife Fâtıma ile li-ebeveyn kız karındaşı mezbûre Şerife Hadîce ve li-ebeveyn ammisi es-Seyyid Hüseyin nâm kimesneye münhasıra ve tashîh-i meseleleri bi-tarîkı’l-münâsahati’ş-şer‘iyye bin seksen sehmden olup sihâm-ı mezbûreden üç yüz doksan dört sehmi mezbûre Şerife Fâtıma’ya ve beş yüz seksen sekiz sehmi mezbûre Şerife Hadîce’ye ve doksan sekiz sehmi mezbûr es-Seyyid Hüseyin’e isâbeti tahakkukundan sonra mezbûr es-Seyyid Hüseyin meclis-i şer‘-i hatîr-ı lâzımü’t-tevkīrde İznik subaşısı bâ‘is-i hâze’l-kitâb Mustafa Ağa b. Mehmed muvâcehesinde üzerine da‘vâ ve takrîr-i kelâm edip müteveffâ-yı evvel-i mezbûrun terekesinden olup mezbûr Mustafa Ağa’nın yedinde olan hüccet-i şer‘iyyede tahdîd olunduğu vech üzere mesbûku’z-zikr Dutluca karyesinde vâki‘ bir bâb mülk menzil ve üç kıt‘a mülk bahçeden bi-tarîkı’l-münâsaha tashîh-i mezkûr üzere bana isâbet eden doksan sekiz sehm hisse-i irsiyemi Mustafa Ağa bi-gayr-ı hakkın fuzûlî kabz etmekle suâl olunup kasr-ı yed ve mahallinde bana teslîme mezbûr Mustafa Ağa’ya tenbîh olunmak matlûbumdur dedikde gıbbe’s-suâl mezbûr Mustafa Ağa cevâbında müdde‘î-i merkūm es-Seyyid Hüseyin zikr olunan menzil ve bahçeden doksan sekiz hisse-i irsiyesini bin yüz elli bir senesi Zilka‘desinin on beşinci günü şer‘iyyâtî fazîletli Mehmed Efendi huzûrunda otuz guruşa mezbûre Şerife Hadîce’ye bey‘ ve semeninden zimmetini ba‘de’l-ibrâ mezbûre Şerife Hadîce dahi semen-i ma‘lûma bana bey‘ etmeğin mülk-i müşterâm olmak üzere bi-hakkın zabt ederim deyü mazmûnu min-külli’l-vücûh takrîrine mutâbık târîh-i mezkûruyla müverrah ve mûmâ-ileyhin imzâsıyla mümzâ ve hâtemiyle mahtûm bir kıt‘a hüccet-i şer‘iyye ibrâzıyla def‘ edicek gıbbe’l-istintâk ve’l-inkâr mezbûr Mustafa Ağa’dan mazmûn-ı hüccet-i mezkûreye beyyine taleb olundukda udûl-ı ahrâr-ı ricâl-i Müslimînden ve zeyl-i hüccet-i mezkûrda isimleri mastûr İbrahim Ağa b. Mehmed ve es-Seyyid Mehmed b. es-Seyyid Hasan ve Mehmed b. Musli ve Hüseyin b. Hacı İbrahim nâm kimesneler li-ecli’ş-şehâde meclis-i şer‘a hâzırûn olup isre’l-istişhâd fi’l-hakīka işbu müdde‘î-i mezbûr es-Seyyid Hüseyin müteveffâ-yı evvel-i mezbûrun terekesinden olup vilâyet-i Anadolu’da İznik kazâsına tâbi‘ Dutluca nâm karyede vâki‘ merhûm Mustafa Ağa’nın yedinde olan hüccet-i şer‘iyyede tahdîd olunduğu vech üzere bir bâb mülk menzil ve üç kıt‘a mülk bahçeden bi-tarîkı’l-münâsaha tashîh-i mezkûr üzere hissesine isâbet eden doksan sekiz sehm hisse-i irsiyesini bin yüz elli bir senesi Zilka‘desinin on beşinci günü şer‘iyyâtî fazîletlü Mehmed Efendi huzûrunda bizler hâzır olduğumuz halde mezbûre Şerife Hadîce’ye otuz guruşa bey‘ ve semeninden zimmetini ba‘de’l-ibrâ yedine işbu hüccet-i şer‘iyyeyi vermişdi bizler bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebince müdde‘î-i mezbûr es-Seyyid Hüseyin bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-Zilhicceti’ş-şerîfe sene 1152. Şuhûdü’l-hâl: Mehmed Çelebi b. Abdullah, Salih Çelebi b. Süleyman, Molla Hüseyin du‘âcı, es-Seyyid Mustafa b. Hasan, es-Seyyid Ali b. Mehmed, Boşnak Ahmed b. Şa‘bân