Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 116 Hüküm no: 63 Orijinal metin no: [9b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bozmacı Haçador’un bazı ev eşyasını karısı Gevher’e satması Mübâya‘a eşyâ Mahmiye-i İstanbul’da Kâtibkasım mahallesinde mütemekkin Bozmacı Haçador v. Karabet v. Abraham nâm zimmî meclis-i şer‘-i şerîf-i enverde zevcesi râfi‘atü hâze’r-rakīm Gevher bt. Nikifos b. Zümrüd nâm Nasrâniyenin sadrî kebîr oğlu ve tarafından bey‘-i câi’z-zikri tasdîka vekîl olduğu şahs-ı mesfûreyi bi’l-ma‘rifeti’ş-şer‘iyye ârifân mahalle-i mezbûre imâmı Mustafa Efendi b. Nasuh ve Müezzin Mehmed Halîfe b. Hacı İbrahim şehâdetleriyle ber-nehc-i şer‘î sâbit olan Küstustur nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olan on köhne beledî yasdık ve dört sadr minderi ve dört yemenî yorgan ve iki beledî döşek ve otuz vakıyye evân-ı nühâsiyeyi tarafeyden îcâb ve kabûlü hâvî şurût-ı müfsideden ârî bey‘-i kat‘î ve safka-i vâhide ile zevcem müvekkile-i mesfûre Gevher’e yetmiş guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve kabz ve tesellüm ve kabûl eylediğinden sonra semeni olan meblağ-ı merkūm yetmiş guruş mutâlebesine müte‘allıka âmme-i de‘âvî ve kâffe-i mutâlebâtdan zevcem müvekkile-i mesfûrenin zimmetini ibrâ ve ıskāt eyledim fîmâ-ba‘d eşyâ-i muharrere-i mezkûre zevcem müvekkile-i mesfûre Gevher’in mülk-i müşretâsı olup kat‘an benim alâka ve medhalim kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 28 min-Zilhicce sene 1152. Şuhûdü’l-hâl: İmâm Mustafa Efendi b. Nasuh, Müezzin Mehmed Halîfe b. Hacı İbrahim, Ahmed Beşe b. Mehmed, Abdülmümin b. Ahmed, Hasan Ağa b. İbrahim, Mehmed Beşe b. Mustafa, Tuzcu Mustafa b. Mehmed, Molla Feyzullah b. Mustafa, es-Seyyid Mustafa b. Mehmed