Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 117 Hüküm no: 64 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sefere giderken hanımı Fatıma’ya nafaka vermesi için Hasan’ı vekil tayin eden Kasap Mehmed Beşe’nin iki sene önce seferde şehit olmasından dolayı nafakanın kesildiği İhbâr-ı mevt Mahmiye-i İstanbul’da Sultan Selim Câmi‘i kurbünde Çukur Bostan mahallesinde sâkine bâ‘isetü’l-kitâb Fâtıma bt. Mustafa nâm hatun meclis-i şer‘-i hatîr-ı lâzımü’t-tevkīrde Hasan b. Abdullah nâm kimesne mahzarında üzerine da‘vâ ve takrîr-i kelâm edip zevcim Kasab Mehmed Beşe b. Abdullah b. Abdurrahman nâm kimesne dört sene mukaddem diyâr-ı âhara gider oldukda beher mâh birer guruş nafakamı mezbûr Hasan’dan havâle-i sahîha-i şer‘iyye ile havâle eylediğinde ol dahi havâle-i mezkûreyi kabûl etmeğin zikr olunan dört senede müctemi‘ kırk sekiz guruşun yirmi dört guruşunu mezbûr Hasan yedinden ahz u kabz edip mâ‘adâ iki senelik yirmi dört guruşu mezbûr Hasan’dan taleb ederim suâl olunsun dedikde gıbbe’s-suâl mezbûr Hasan cevâbında ber-vech-i muharrer havâle-i mezkûreyi ikrâr lâkin müdde‘iye-i mezbûre Fâtıma Hatun’un zevci Kasab Mehmed Beşe b. Abdullah b. Abdurrahman târîh-i kitâbdan iki sene mukaddem Nemçe seferinde Logoş karşısında şehîden fevt olmağla nafaka mutâlebesinden zimmetim berî olmuşdur deyü def‘le mukābele edicek gıbbe’l-istintâk ve’l-inkâr dâfi‘-i mezbûr Hasan’dan def‘-i mezkûruna beyyine taleb olundukda udûl-ı ahrâr-ı ricâl-i Müslimînden ve Dergâh-ı âlî yeniçerilerinden dördüncü cemâ‘ate mahsûs oda neferâtından Mustafa Beşe b. Hüseyin ve Sakā Halil Beşe b. İbrahim nâm kimesneler li-ecli’ş-şehâde meclis-i şer‘a hâzırân [olup] istişhâd olunduklarında fi’l-hakīka işbu müdde‘iye-i mezbûre Fâtıma’nın zevci Kasab Mehmed Beşe b. Abdullah b. Abdurrahman târîh-i kitâbdan iki sene mukaddem Nemçe seferinde Logoş karşısında şehîden fevt olup biz cenâzesini müşâhede eyledik biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebince müdde‘iye-i mezbûre Fâtıma Hatun bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Zilhicce sene 1152. Şuhûdü’l-hâl: Mehmed b. Süleyman, Süleyman b. Mehmed Nakkaş Ahmed b. Süleyman, Acem Ali b. Abdullah, Ahmed b. Şa‘bân