Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 117 Hüküm no: 65 Orijinal metin no: [10a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm Hatun’un eşi Mustafa’dan boşandığı Muhâla‘a Mahmiye-i İstanbul’da Arabacı Bayezid mahallesinde sâkine bâ‘isetü hâzihi’l-vesîka Şerife Ümmügülsüm Hatun bt. es-Seyyid el-Hâc Salih b. Abdullah’ın li-üm karındaşı ve tarafından husûs-ı âti’z-zikre vekîl olduğu zâtını ârifân Halil Ağa b. Hüseyin ve Ahmed Ağa b. Süleyman şehâdetleriyle ber-nehc-i şer‘î sâbit olan Mustafa b. Mehmed meclis-i şer‘-i hatîr-ı lâzımü’t-tevkīrde müvekkile-i merkūmenin zevc-i muhâli‘ı diğer Mustafa Çelebi b. Veliyüddin muvâcehesinde bi’l-vekâle ikrâr-ı tâm ve takrîr-i kelâm edip mezbûr diğer Mustafa Çelebi müvekkilem mezbûrenin zevc-i dâhili olup beynlerinde hüsn-i mu‘âşeretleri olmamağla zimmetinde mütekarrer ve ma‘kūdün-aleyh olan on bin iki yüz akçe mehr-i müeccel ve nafaka-i iddet-i ma‘lûmesi üzerlerine ve cihet-i karzdan zimmetinde olan on iki guruş bedele hul‘ olup me’ûnet-i süknâsı dahi kendi üzerine olmak üzere mezbûr diğer Mustafa ile muhâla‘a-i sahîha-i şer‘iyye ile vekâlet-i mahkiyem hasebiyle vech-i şer‘î üzere hul‘ olduğumda ol dahi ber-vech-i meşrûh hul‘-i mezbûru kabûl eyledikden sonra hukūk-ı zevciyete ve sâir hukūk-ı ma‘lûme ve mechûleye müte‘allıka âmme-i da‘vâdan bi’l-vekâle mezbûr diğer Mustafa’nın zimmetini bi’l-vekâle ibrâ ve ıskāt eylediğimde ol dahi kezâlik hukūk-ı zevciyete ve sâir hukūka müte‘allıka âmme-i da‘vâdan müvekkilem mezbûre Şerife Ümmügülsüm’ün zimmetini ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 26 min-Zilhicce sene 1152. Şuhûdü’l-hâl: Abdülhamid Efendi imâm, Mehmed Halîfe b. Salih müezzin, Ahmed Ağa b. Mustafa, İbrahim Beşe b. Ali, el-Hâc İsmail b. İbrahim, Ahmed Çavuş b. Süleyman, es-Seyyid Mehmed b. Ahmed, Halil Ağa b. Hüseyin