Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 118 Hüküm no: 66 Orijinal metin no: [10a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Hamide’nin terekesinden olan cariye Şahbaz’ı varislerin azat ettiği Itâknâme Mahmiye-i İstanbul’da Haraccı Muhyiddin mahallesinde sâkine iken bundan akdem fevt olan Hacce Hamide bt. Ahmed Efendi b. Ramazan nâm hatunun verâseti zevc-i metrûku el-Hâc İbrahim Odabaşı b. Selim ile usûbet-i nesebiye cihetinden ammizâdesi el-Hâc Ali Efendi b. İbrahim Efendi ve âhar ammizâdeleri Mustafa ve Hasan ve el-Hâc Ebubekir b. Osman Efendi’ye münhasıra olduğu lede’ş-şer‘i’l-enver zâhir ve mütehakkık oldukdan sonra mezbûrân el-Hâc İbrahim Odabaşı ve el-Hâc Ali Efendi asâleten ve merkūm Mustafa Çelebi dahi kendiden asâleten ve li-ebeveyn karındaşı merkūmân el-Hâc Ebubekir ve Hasan taraflarından ıtk-ı âti’z-zikre sâbitü’l-vekâle vekîlleri olmağın vekâleten meclis-i şer‘-i şerîf-i enverde müteveffiye-i mezbûra rıkkıyetini mu‘terife olan orta boylu açık kaşlı elâ gözlü Gürciyyetü’l-asl Müslimetü’l-millet bâ‘isetü hâzihi’l-vesîka Şahbaz bt. Abdullah muvâcehesinde her biri asâleten ve vekâleten ikrâr ve takrîr-i kelâm edip mevsûfe-i mezbûre Şahbaz bi’l-ırsi’ş-şer‘î bizlere mevrûs olmağla her birimiz mevsûfe-i mezbûre Şahbaz’ı hasbeten lillâhi te‘âlâ cemî‘ mâlımızdan tahrîr ve i‘tâk ve kayd-ı rıkdan ıtlâk ve harâir-i asliyât silkine idrâc ve ilhâk eyledik, fîmâ-ba‘d mevsûfe-i mezbûre Şahbaz sâir harâir-i asliyât gibi hürre olup bizim ve müvekkilân-ı merkūmânın üzerinde velâ-i şer‘îden gayrı hakkımız kalmadı dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 24 min-Zilhicce sene 1152. Şuhûdü’l-hâl: Mehmed Çelebi b. Abdullah, Mustafa b. Mehmed, Molla Hüseyin du‘âcı, es-Seyyid Ali b. Mustafa, Mehmed b. Mustafa, Ali b. Abdullah