Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 119 Hüküm no: 67 Orijinal metin no: [10a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. Abdullah’ın evini Mehmed b. Ebubekir’e satması Mübâya‘a Mahmiye-i İstanbul’da el-Hâc Hasan mahallesinde sâkine olup zâtı fahrü’l-kuzât el-Hâc Abdullah Efendi b. Hasan ve Mehmed Çelebi b. Abdullah ta‘rîfleriyle mu‘arrefe olan Rukiye bt. Abdullah nâm hatun meclis-i şer‘-i şerîf-i enverde bâ‘isü’l-kitâb el-Hâc Mehmed b. Ebubekir nâm kimesne mahzarında ikrâr ve takrîr-i kelâm edip arsasının merhûm el-Hâc Bey Vakfı’na senede üç yüz altmış akçe mukāta‘ası ve ebniyesi yedimde mülk ve hakkım olup mahalle-i mezbûrede vâki‘ bir tarafdan zikr olunan el-Hâc Hasan Câmi‘-i şerîfi Vakfı’ndan merhûm Abdülbaki Efendi veresesi tasarruflarında olan vakıf menzil ve bir tarafdan Veli Efendi bahçesi demekle ma‘rûf bahçe ve bir tarafdan câmi‘-i mezkûr müezzinine meşrûta vakıf menzil ve bir tarafdan tarîk-i âm ile mahdûd fevkānî üç bâb oda ve tahtânî bir bâb oda ve bir matbah ve kenîf ve havluyu müştemil menzilin ber-vech-i meşrûh ebniye-i memlûkesini bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı sahîh-i şer‘î ile mezkûr el-Hâc Mehmed’e beş yüz elli guruşa bey‘ ve temlîk ve teslîm ve arsasını dahi bâ-ma‘rifet-i mütevellî meccânen ferâğ ve tefvîz eylediğimde ol dahi ber-vech-i muharrer iştirâ ve temellük ve tesellüm ve tefevvüz ve kabz ve kabûl eylediğinden sonra semeni olan meblağ-ı mezbûr beş yüz elli guruşu mezbûr el-Hâc Mehmed bana def‘ ve teslîm ben dahi yedinden tamâmen ahz u kabz eyledim ba‘de’l-yevm tahdîd olunan menzil-i mezkûrda benim alâka ve medhalim kalmayıp mezbûr el-Hâc Mehmed’in ebniye-i mezkûresi ve mülk-i müşterâsı ve arsası dâhil-i havza-i tasarrufu olmuşdur dedikde gıbbe’t-tasdîkı’ş-şer‘î menzil-i mahdûd-ı mezkûrun derkine ve semeni olan meblağ-ı mezbûr beş yüz guruşa bi’l-emr ve’l-kabûl Dergâh-ı âlî cebecilerinin birinci bölük neferâtından Çukadâr Ahmed Beşe b. Hasan b. Abdullah nâm kimesne dahi kefîl ve zâmin olmağın mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Zilhicce sene 1152. Şuhûdü’l-hâl: Hamza Efendi b. Ahmed, el-Hâc Hüseyin b. Mehmed, Hüseyin Çelebi b. Mehmed