Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 120 Hüküm no: 68 Orijinal metin no: [10b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva Hatun’un evine ait arsanın bir kısmını ayırıp geri kalanı İbrahim Çelebi’ye sattığı Mübâya‘a Dârü’s-saltanati’l-aliyye Kostantıniyyetü’l-mahmiyede el-Hâc Ferhad mahallesinde sâkine Havva bt. Hasan b. Abdullah nâm hatunun zevci ve tarafından bey‘-i âti’z-zikre vekîl olduğu zâtını ma‘rifet-i şer‘iyye ile ârifân el-Hâc Abdullah b. Ali ve Hasan b. Abdullah nâm kimesneler şehâdetleriyle sâbit olan Salih Beşe b. Receb nâm kimesne meclis-i şer‘-i hatîr-ı lâzımü’t-tevkīrde işbu bâ‘isü’l-kitâb es-Seyyid İbrahim Çelebi b. Mustafa mahzarında bi’l-vekâle ikrâr-ı tâm ve takrîr-i kelâm edip zikri câî akdin sudûruna değin müvekkilem mezbûre Havva’nın yedinde mülk ve hakkı olup mahalle-i mezbûrede vâki‘ bir tarafdan Âişe Hatun mülkü ve bir tarafdan Mustafa Çelebi mülkü ve tarafeyni tarîk-i âm ile mahdûd büyût-ı adîde ve havluyu müştemil mülk menzilin tarîk-i âm tarafından tûlen ve arzen bi-hesâb-ı terbî‘î beş buçuk zirâ‘ arsasını alâmât-ı fâsıla vaz‘ıyla ba‘de’l-ifrâz arsa-i müfrezenin havasıyla menzil-i mezkûru alâ mâ yeştemilühû ve yahvîhi tarafeynden îcâb ve kabûlü hâvî bey‘-i bâtt-ı sahîh-i şer‘î ile bi’l-vekâle merkūm es-Seyyid İbrahim Çelebi’ye iki yüz guruşa bey‘ ve temlîk ve teslîm eylediğimde ol dahi ber-vech-i mübeyyen iştirâ ve temellük ve kabz ve tesellüm ve kabûl edip semeni olan meblağ-ı mezbûr iki yüz guruşu müşteri-yi merkūm es-Seyyid İbrahim Çelebi yedinden bi’l-vekâle ahz [ü] kabz eyledim ba‘de’l-yevm zikr olunan beş buçuk zirâ‘ arsa-i müfrezeden mâ‘adâ menzil-i mahdûd-ı mezkûr merkūm es-Seyyid İbrahim Çelebi’nin mülk-i müşterâsı olup müvekkilem mezbûre Havva’nın alâka ve medhali kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 23 min-Zilhicce sene 1152. Şuhûdü’l-hâl: el-Hâc Ahmed Efendi el-imâm, Müezzin Mehmed Halîfe b. (°), Hacı Süleyman b. Mustafa, Molla Mehmed b. Abdullah, el-Hâc Abdullah b. Ali, Ali Efendi el-kādı, Mehmed b. İbrahim, Ömer Efendi el-kādı