Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 120 Hüküm no: 69 Orijinal metin no: [10b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Abdullah’ın Aleksan’dan alacağı konusundaki davaya sulh bedeli karşılığı son verildiği Sulh, bâ-imzâ-i efendi Mahmiye-i İstanbul’da Cağalazâde Sarayı kapısı mukābilinde vâki‘ ekmekçi fırınında müste’ciren sâkin Mustafa b. Abdullah nâm kimesne meclis-i şer‘-i şerîf-i enverde mahmiye-i mezbûrede Küçük Mustafa Paşa fırını ustası olan hâmil-i hâzihi’l-vesîka Papasoğlu Aleksan nâm zimmî muvâcehesinde ikrâr ve takrîr-i kelâm edip bundan akdem mesfûr Aleksan zimmetinde cihet-i karz-ı şer‘îden iki yüz guruş hakkım vardır taleb ederim deyü da‘vâ eylediğimde ol dahi inkâr edip ol vechile ba‘de vukū‘i’l-münâza‘a beynimizde muslihûn tavassut edip da‘vâ-yı mezkûremden beni mezbûr Aleksan ile an-inkâr otuz guruş üzerine sulh eylediklerinde ben dahi ber-vech-i mübeyyen sulh-ı mezbûru kabûl ve bedel-i sulh olan meblağ-ı mezbûr otuz guruşu mesfûr Aleksan’ın yedinden bi’t-tamâm ahz u kabz edip husûs-ı mezkûra ve mahmiye-i mezbûre hısnı ebvâbından Unkapanı kapısı dâhilinde vâki‘ ekmekçi fırınına ve sâir işbu târîh-i vesîkaya gelince beynimizde cereyân eden cemî‘ ahz u i‘tâ ve mu‘âmelât-ı şettâdan hukūk-ı ma‘lûme ve mechûleye müte‘allıka âmme-i de‘âvî ve kâffe-i mutâlebât ve eymân ve muhâsamâtdan mesfûr Aleksan’ın zimmetini ibrâ ve ıskāt eyledim vechen mine’l-vücûh ve sebeben mine’l-esbâb mezbûr Aleksan ile aslâ ve kat‘â da‘vâ ve nizâ‘ ve husûmetim yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Zilhicce sene 1152. Şuhûdü’l-hâl: Salih b. Süleyman, el-Hâc Mustafa b. Mehmed, Kethüdâ Mehmed b. Mahmud, Mahmud b. Abdullah, Yusuf b. Abdullah