Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 121 Hüküm no: 70 Orijinal metin no: [10b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sadıka bt. Abdullah’ın evini Mustafa ile hanımı Ayşe Hatun’a sattığı Bi-imzâ-i efendi Mübâya‘a-i menzil, 600 guruş Husûs-ı âti’l-beyânın mahallinde ketb ü tahrîri için cânib-i şer‘-i hatîrden irsâl olunan Mevlânâ Feyzullah b. eş-Şeyh Mehmed Efendi mahmiye-i İstanbul’da hısnı ebvâbından Cibali Yenikapısı dâhilinde Çukur mahallede fahrü’l-müderrisîni’l-kirâm Vahidîzâde Mehmed Emin Efendi’nin halîle-i mükerremeleri Sadıka bt. Abdullah nâm hatunun sâkine oldukları menzile varıp zeyl-i kitâbda mektûbü’l-esâmî Müslimîn huzûrlarında akd-i meclis-i şer‘-i Nebevî ettikde zâtı Şehrî Mehmed Ağa b. Ahmed ve es-Seyyid el-Hâc Seyfullah b. es-Seyyid Mehmed ta‘rîfleriyle mu‘arrefe olan merkūme Sadıka Hatun meclis-i ma‘kūd-ı mezkûrda kendi tarafından asîl ve zevcesi Âişe bt. Abdullah b. Abdülmennan nâm hatun tarafından husûs-ı âti’z-zikri tasdîka vekîl olduğu zât-ı mezbûreyi ârifân el-Hâc Mehmed b. Hüseyin ve es-Seyyid el-Hâc Mehmed b. el-Hâc İbrahim şehâdetleriyle sâbit olan işbu bâ‘isü’l-kitâb el-Hâc Mustafa b. Hüseyin mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan Havva Hatun menzili ve bir tarafdan Fâtıma Hatun menzili ve bir tarafdan ba‘zan Berber İbrahim kerîmesi ve ba‘zan Ma‘den Halîfesi karındaşı kızı (°) menzili ve bir tarafdan tarîk-i âm ile mahdûd hâriciyesinde bir oda ve kenîf ve dâhiliyesinde tabaka-i ulyâda bir oda ve bir sofa ve tahta-bend ve tabaka-i vustâda iki oda ve bir sofa ve tabaka-i süflâda bir kilâr ve matbah ve mağsel ve kenîf ve bi’r-i mâ ve müştemilât-ı sâire-i ma‘lûmeyi hâvî menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î mezbûr el-Hâc Mustafa ile zevcesi müvekkile-i mezbûre Âişe Hatun’a ale’l-iştirâki’s-seviyy altı yüz guruşa bey‘ ve temlîk ve teslîm eylediğimde ol dahi bi’l-asâle ve bi’l-vekâle vech-i muharrer iştirâken iştirâ ve tesellüm ve kabz ve kabûl eylediğinden sonra semeni olan meblağ-ı mezbûr altı yüz guruşu mezbûr el-Hâc Mustafa yedinden tamâmen ahz u kabz eyledim ba‘de’l-yevm menzil-i mahdûd-ı mezkûrda benim kat‘an alâka ve medhalim kalmayıp mezbûr el-Hâc Mustafa ile zevcesi müvekkile-i mezbûre Âişe Hatun’un ale’l-iştirâki’s-seviyy mülk-i müşterâları ve hakk-ı sırfları olmuşdur keyfe mâ yeşâ’ân ve yehtârân mutasarrıf olsunlar dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘de ma‘an ba‘s olunan ümenâ-i şer‘le meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâdis ve’l-ışrîn min-Zilhicceti’ş-şerîfe sene 1152. Şuhûdü’l-hâl: el-Hâc Mehmed Efendi b. İbrahim el-imâm, Şehrî Mehmed Ağa b. Ahmed, Çukadâr Osman Ağa b. Ömer, Yusuf Çelebi b. İbrahim, es-Seyyid el-Hâc Seyfullah b. es-Seyyid Mehmed, es-Seyyid el-Hâc Mehmed Çelebi b. el-Hâc İbrahim, el-Hâc Mehmed Çelebi b. Hüseyin, Attâr Ahmed Efendi b. (°), Berber Kara Hasan Çelebi b. Abdullah