Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 122 Hüküm no: 71 Orijinal metin no: [11a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avanes ile kız kardeşi Nori’nin bahçelerinin bir kısmını İbrahim Ağa’ya sattıkları Mübâya‘a Mahmiye-i İstanbul’da Silivrikapısı dâhilinde İbrahim Paşa-i atîk mahallesi mütemekkinlerinden Avanes nâm Ermeni ile kız karındaşı olup şahsı Ahmed Efendi b. Abdullah ve Mehmed Odabaşı b. Abdullah nâm kimesneler ta‘rîfleriyle mu‘arrefe olan Nori nâm Nasrâniye v. Kirkor nâm zimmî meclis-i şer‘-i şerîf-i enverde bâ‘isü’l-kitâb İbrahim Ağa b. Hüseyin mahzarında her biri ikrâr ve takrîr-i kelâm edip akd-i âtî sudûruna değin iştirâk-i seviyy üzere yedimizde mülk ve hakkımız olup mahalle-i mezbûrede vâki‘ bir tarafdan Süleyman Efendi menzili ve bir tarafdan Ağa Çayırı bostanı ve bir tarafdan müşteri-yi mezbûr İbrahim Ağa’nın Kirkor nâm zimmîden iştirâ eylediği bahçe ve bir tarafdan tarîk-i âm ile mahdûd büyût-ı adîde ve eşcâr-ı müsmire ve gayr-ı müsmireli bahçeyi müştemil mülk menzilimin mezkûr bahçesinden zikr olunan Ağa Çayırı bostanı tarafından ve müşteri-yi mezbûrun tasarrufunda olan merkūm Kirkor zimmî bahçesi duvarında vâki‘ mesdûd sokak kapısı yeri olan mahalden tûlen tarîk-i âm cânibinde nâbit kara incir ağacına ve arzen hâlâ tasarrufumuzda olan samanlık odasına müntehî oluncaya değin ifrâz ve alâmât-ı fâsıla vaz‘ıyla mümtâz kıldığımız ba‘zı eşcârı muhtevî bahçe arsasını bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr İbrahim Ağa’ya yüz otuz guruşa bey‘ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr yüz otuz guruşu cihet-i deyn-i şer‘îden mezbûr İbra[him] Ağa’ya zimmetimizde deynimiz olan yüz otuz guruşa takas ve mahsûb eylediğimizde ol dahi mukāssa ve kabûl eyledi ba‘de’l-yevm ber-minvâl-i muharrer ifrâz ve tahdîd olunan bahçede bizim alâkamız kalmayıp mezbûr İbrahim Ağa’nın mülk-i müşterâsı olmuşdur dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 23 min-Zilhicce sene 1152. Şuhûdü’l-hâl: Süleyman Efendi imâm-ı Ali Paşa-i atîk, Kapıcı Mustafa bâb-ı Silviri, Kapıcı es-Seyyid Mehmed kezâlik, Eğribozlu Mehmed Beşe, Yedikule Anahtarcısı Molla Mehmed b. (°)