Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 123 Hüküm no: 72 Orijinal metin no: [11a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. Ahmed’in Ebubekir Ağa’dan boşandığı Muhâla‘a Mahmiye-i İstanbul’da Hoca Hayreddin mahallesinde sâkine Rukiye bt. Ahmed nâm hatunun anası ve tarafından hul‘-i âti’z-zikri ikrâra vekîl olduğu zâtı Ahmed Efendi b. el-Hâc Ahmed ve İbrahim Ağa b. Mehmed ta‘rîfleriyle mu‘arrefe olan Fâtıma bt. Abdullah nâm hatun meclis-i şer‘-i şerîf-i enverde müvekkile-i mezbûrenin zevc-i dâhili Dergâh-ı âlî yeniçerileri çavuşlarından bâ‘isü’l-kitâb Ebubekir Ağa b. Osman mahzarında bi’l-vekâle ikrâr ve takrîr-i kelâm edip mezbûr Ebubekir Ağa kızım müvekkile-i mezbûrenin zevci olup beynlerinde hüsn-i mu‘âşeretleri olmamağla zimmetinde mütekarrer ve ma‘kūdün-aleyh yedi bin akçe mehr-i müecceli ile mezbûr Ebubekir Ağa’nın firâşından hâsıl hamli olmağla vaz‘-ı haml ile iddeti münkazıye oluncaya değin nafaka-i iddet-i mu‘ayyene-i ma‘lûmesi üzerlerine ve me’ûnet-i süknâsı dahi kendi üzerine olmak üzere mezbûr Ebubekir Ağa ile bi’l-vekâle muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete müte‘allıka âmme-i da‘vâdan ben mezbûr Ebubekir Ağa’nın zimmetini bi’l-vekâle ibrâ ve ıskāt eylediğimde ol dahi kezâlik hukūk-ı zevciyete müte‘allıka âmme-i da‘vâdan kızım müvekkile-i mezbûre Rukiye’nin zimmetini ibrâ ve ıskāt eyledi dedikde gıbbe’t-tasdîkı’ş-şer‘î mâ-vâka‘a bi’t-taleb ketb olundu. Fî 26 min-Zilhicce sene 1152. Şuhûdü’l-hâl: Mustafa Efendi b. el-Hâc Mahmud, Abdullah Ağa b. Süleyman, Nalband Mustafa Beşe b. Mehmed, el-Hâc Şa‘bân b. Mehmed attâr, Mehmed b. Süleyman muhzır