Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 124 Hüküm no: 73 Orijinal metin no: [11a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Beşe’nin vefat eden Ahmed Çavuş’un kardeşi ve varisi olduğu iddiasından vazgeçtiği Fi’l-asl vilâyet-i Anadolu’da Divriği kasabası ahâlîsinden olup Görele kazâsına tâbi‘ Pazar karyesi sâkinlerinden iken bundan akdem fevt olan Ahmed Çavuş b. Abdi b. Abdullah’ın li-ebeveyn er karındaşı ve usûbet-i nesebiye cihetinden hasren vârisi olan Hüseyin Beşe nâm kimesne meclis-i şer‘-i hatîr-ı lâzımü’t-tevkīrde işbu râfi‘ü’l-vesîka el-Hâc Mehmed b. Ali nâm kimesne muvâcehesinde ikrâr-ı tâm ve takrîr-i kelâm edip bundan akdem merkūm el-Hâc Mehmed’den karındaşı müteveffâ-yı mezbûrun kürkü ve nukūd ve eşyâsı olup müteveffâ-yı mezbûrun ben hasren vârisi olmağla taleb ederim deyü da‘vâ sadedinde olmuş idim, el-hâletü hâzihi da‘vâ-yı mezkûrede ben kâzib ve mubtıl olup mûrisim müteveffâ-yı merkūm Ahmed Çavuş’un mezbûr el-Hâc Mehmed yedinde ve zimmetinde bir akçe ve bir habbe hakkı olmamağla husûs-ı mezbûra ve târîh-i vesîkaya gelince sâir hukūk-ı ma‘lûme ve mechûleye müte‘allıka kalîl ü kesîr celîl ü hakīr âmme-i da‘vâ ve [mu]hasâmât ve kâffe-i mutâlebât ve eymândan merkūm el-Hâc Mehmed’in zimmetini ibrâ-i âmm-ı katı‘u’n-nizâ‘la ibrâ ve ıskāt eyledim ba‘de’l-yevm merkūm el-Hâc Mehmed ile vechen mine’l-vücûh ve sebeben mine’l-esbâb kat‘an da‘vâ ve nizâ‘ ve husûmetim yokdur dedikde merkūm el-Hâc Mehmed mukırr-ı mezbûr Hüseyin Beşe’yi cemî‘ takrîr-i meşûhunda vicâhen ve şifâhen tahkīk ve tasdîk etmeğin mâ-hüve’l-vâki‘ bi’t-taleb ketb olundu. Fî 27 min-Zilhicceti’ş-şerîfe sene 1152. Şuhûdü’l-hâl: Fahrü’l-kuzâti’l-kirâm es-Seyyid Mahmud Efendi b. es-Seyyid Ömer, es-Seyyid Mustafa Çelebi b. es-Seyyid Ömer, es-Seyyid Mehmed Efendi b. es-Seyyid Hasan, İsmail Ağa b. İbrahim, Mehmed Ağa b. Osman, Hasan Beşe b. Ali, Salih Çelebi b. Süleyman, Abdullah Çelebi b. Mehmed, Mehmed b. Eyüb