Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 124 Hüküm no: 74 Orijinal metin no: [11a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Mustafa’nın küçük kızı Emine’ye nafaka takdiri Nafaka Mahmiye-i İstanbul’da Akşemseddin mahallesi sâkinelerinden olup zâtı ta‘rîf-i şer‘î ile mu‘arrefe olan işbu bâ‘isetü’l-vesîka Fâtıma bt. Mustafa nâm hatun meclis-i şer‘-i şerîf-i enverde zevc-i sâbıkı Mehmed b. Mehmed nâm kimesne mahzarında takrîr-i kelâm ve ta‘bîr ani’l-merâm edip mezbûr Mehmed’in firâşından hâsıla ve benden mütevellide hâlâ bi-hakkı’l-hıdâne hacr ve terbiyemde olan sadriye sagīre kızım Emine’nin mâlı olmayıp nafaka ve kisveye eşedd-i ihtiyâcı olmağla sagīre-i mezbûrenin nafaka ve kisve ve sâir levâzım-ı zarûriyesi’çün babası mezbûr Mehmed üzerine kıbel-i şer‘den kadr-ı kifâye nafaka ve kisve-bahâ farz ve takdîr olunmak matlûbumdur dedikde gıbbe’t-tasdîkı’ş-şer‘î hâkim-i muvakkı‘-ı sadr-ı kitâb tûbâ-lehû ve hüsnü meâb efendi hazretleri dahi sagīre-i mezbûrenin nafaka ve kisve ve sâir levâzım-ı zarûriyesi’çün babası mezbûr Mehmed Efendi’ye târîh-i vesîkadan bi’t-terâzi küllü yevm ikişer para farz ve takdîr buyurup meblağ-ı mefrûz-ı mezbûr ikişer parayı sagīre-i mezbûrenin nafaka ve kisve ve sâir levâzım-ı zarûriyesine harc ü sarfa ve vakt-i zarûretde istidâneye ve lede’z-zafer babası merkūm Mehmed üzerine rücû‘a mezbûre Fâtıma’ya izin birle mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min-Zilhicce sene 1152. Şuhûdü’l-hâl: Abdullah Çelebi b. Mehmed, Üsküdarî Ali muhzır, Mustafa Çelebi b. (°), Molla Hüseyin du‘âcı