Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 127 Hüküm no: 77 Orijinal metin no: [11b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un küçük oğlu Emrullah’a nafaka takdiri Nafaka Mahmiye-i İstanbul’da Kızılmescid mahallesi sâkinelerinden olup zâtı ta‘rîf-i şer‘î ile mu‘arrefe olan bâ‘isetü hâzihi’l-vesîka Hadîce Hatun bt. Ahmed meclis-i şer‘-i hatîr-ı lâzımü’t-tevkīrde zevc-i sâbıkı Mehmed Çelebi b. Ali mahzarında takrîr-i kelâm ve bast-ı merâm edip mezbûr Mehmed Çelebi zevcim iken bundan akdem beni bâyinen tatlîk etmekle mezbûrun firâşından hâsıl ve benden mütevellid ve bi-hakkı’l-hıdâne hacr ve terbiyemde olan işbu Emrullah nâm sagīrin mâlı olmamağla nafaka ve kisveye muhtâc olmağın kıbel-i şer‘den babası mezbûr üzerine kadr-ı ma‘rûf akçe farz ve takdîr olunmak matlûbumdur dedikde gıbbe’t-tasdîkı’ş-şer‘î hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīr-i mezbûrun nafaka ve kisve-bahâsı’çün babası mezbûr Mehmed üzerine bi’t-terâzi târîh-i kitâbdan yevmî dokuz akçe nafaka ve kisve-bahâ farz ve takdîr edip meblağ-ı mefrûz-ı mezbûru sagīr-i mezbûr Emrullah’ın nafaka ve kisve-bahâ ve sâir havâyic-i lâzımesine harc ü sarfa ve lede’l-iktizâ istidâneye ve inde’z-zafer babası mezbûr Mehmed üzerine rücû‘a mezbûre Hadîce’ye izin verilmeğin mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min-Zilhicce sene 1152. Şuhûdü’l-hâl: Bostânî es-Seyyid Abdurrahman b. Mehmed, Mehmed Çelebi b. Süleyman, Üsküdarî Ali b. Abdullah