Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 127 Hüküm no: 78 Orijinal metin no: [12a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Râbia Hatun’un küçük kızı Hatice’ye nafaka takdiri Nafaka Mahmiye-i İstanbul’da Bayezid Ağa mahallesinde sâkine olup zâtı ta‘rîf-i şer‘î ile mu‘arrefe olan bâ‘isetü’l-vesîka Râbia bt. Mehmed nâm hatun meclis-i şer‘-i şerîf-i enverde zevc-i sâbıkı Mustafa b. Ahmed mahzarında ikrâr ve takrîr-i kelâm edip mezbûr Mustafa’nın firâşından hâsıla ve benden mütevellide hâlâ bi-hakkı’l-hıdâne hacr ve terbiyemde olan işbu sadriye sagīre kızım Hadîce’nin nafaka ve kisveye ihtiyâcı olmağla mâlı olmayıp sagīre-i mezbûrenin nafaka ve kisve-bahâsı’çün babası mezbûr Mustafa üzerine kıbel-i şer‘den kadr-ı kifâye nafaka ve kisve-bahâ farz ve takdîr olunmak matlûbumdur dedikde gıbbe’t-tasdîkı’ş-şer‘î hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīre-i mezbûrenin nafaka ve kisve-bahâ ve sâir levâzım-ı zarûriyesi’çün babası mezbûr Mustafa üzerine târîh-i kitâbdan bi’t-terâzi yevmî beşer akçe farz ve takdîr buyurup meblağ-ı mefrûz-ı mezbûru sagīre-i mezbûrenin nafaka ve kisve ve sâir levâzım-ı zarûriyesine harc ü sarfa ve lede’l-iktizâ istidâneye ve inde’z-zafer babası mezbûr Mustafa üzerine rücû‘a mezbûra Râbia Hatun’a izin birle mâ-vaka‘a bi’t-taleb ketb olundu. Fi’l-yevmi’s-sâdis ve’l-ışrîn min-Zilhicceti’ş-şerîfe sene 1152. Şuhûdü’l-hâl: el-Hâc Mustafa b. Mehmed, es-Seyyid Mustafa b. Hasan, Ahmed b. Şa‘bân, Ali Çelebi b. Abdullah