Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 128 Hüküm no: 79 Orijinal metin no: [12a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bozmacı Haçador’un evdeki hissesini karısı Gevher’e sattığı Mübâya‘a Mahmiye-i İstanbul’da Kâtibkasım mahallesinde mütemekkin Bozmacı Haçador v. Karabet ve Abraham nâm Nasrânî meclis-i şer‘-i şerîf-i enverde zevcesi bâ‘isetü hâzihi’r-rakīm Gevher bt. Nikros v. Hürmüz nâm Nasrâniyenin sadrî oğlu ve bey‘-i âti’z-zikrde tasdîka vekîl olduğu şahs-ı mersûmeyi ma‘rifet-i şer‘iyye ile ârifân mahalle-i mezbûre imâmı Mustafa Efendi b. Nasuh Efendi ve Müezzin Mehmed Halîfe b. el-Hâc İbrahim şehâdetleriyle ber-nehc-i şer‘î olan Küstustur nâm zimmî muvâcehesinde ikrâr-ı tâm ve takrîr-i kelâm edip zikri câî akdin sudûruna değin yedimde mülk ve hakkım olup mesbûku’z-zikr mahallede vâki‘ bir tarafdan Bozmacı Nokfor zimmî menzili ve bir tarafdan Basmacı Manyas zimmî menzili ve bir tarafdan Terzi Avadik zimmî menzili ve bir tarafdan tarîk-i âm ile mahdûd ulyâda bir kebîr ve sagīr iki bâb oda ve bir sofa ve tahta-bend ve matbah ve vüstâda bir kebîr ve bir sagīr iki bâb oda ve bir sofa ve matbah ve kenîf ve süflâda bir bâb oda ve bir sofa ve bir kârgîr ocak ve bir kârgîr mahzen ve kenîf ve havluyu müştemil mülk menzilimin iki hisse i‘tibâriyle nısf hissesini cemî‘ tevâbi‘ ve levâhıkıyla tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile zevcem müvekkile-i mersûme Gevher’e beş yüz guruşa bey‘ ve temlîk eylediğimde ol dahi ber-vech-i mübeyyen iştirâ ve temellük ve kabûl edip semen-i mebî‘ beş yüz guruş mutâlebesine müte‘allıka âmme-i de‘âvî ve muhâsamât ve kâffe-i mutâlebât [ve] eymândan müşteriye-i mersûme Gevher’in zimmetini ibrâ ve ıskāt eyledim ba‘de’l-yevm menzil-i mahdûd-ı mezkûrun nısf hissesi alâ mâ yeştemilühû ve yahvîhi zevcem müvekkile-i mersûme Gevher’in mülk-i müşterâsı olup benim alâka ve medhalim kalmamışdır keyfe mâ teşâ ve tehtâr mutasarrıfa olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Zilhicce sene 1152. Şuhûdü’l-hâl: Fahrü’l-eimme Mustafa Efendi el-imâm, Müezzin Mehmed Halîfe İbrahim, Molla Feyzullah b. Mustafa, Ahmed Beşe b. Mehmed, Abdülmümin b. Ahmed, Sâ‘atî Mehmed b. Mustafa, es-Seyyid Mustafa b. Mehmed, Tuzcu Mustafa b. Mehmed, Mehmed Beşe b. Mustafa, Hasan Ağa b. İbrahim, Papa Karabet v. Artin, Papa İstifa v. Bali, Manyas v. Kirkor, Aleksan v. Haçador, Nakfur v. Avanes