Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 129 Hüküm no: 81 Orijinal metin no: [12a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halime Hanım’ın tarla ve çayırlarını Osman Çelebi’ye sattığına dair terkin edilmiş kayıt < Mahmiye-i İstanbul’da Hoca Veyis mahallesinde sâkine fahrü’l-muhadderât Şerife Halime Hanım bt. es-Seyyid Mehmed Dede Efendi b. es-Seyyid Mustafa’nın sadrî kebîr oğlu ve tarafından husûs-ı âti’l-beyânda ikrâra vekîl olduğu zâtını ma‘rifet-i şer‘iyye ile ârifân Mehmed Ağa b. Ahmed ve Mehmed Ağa b. Mustafa şehâdetleriyle sâbit olan umdetü’l-müderrisîni’l-kirâm es-Seyyid Mehmed Efendi b. Mustafa meclis-i şer‘-i şerîf-i enverde sâhib-i hâzihi’l-vesîka Erzurum kazâsı ahâlîsinden Osman Çelebi b. Muharrem mahzarında bi’l-vekâle ikrâr ve takrîr-i kelâm edip müvekkilem vâlidem mezbûre Halime Hanım işbu temessük mantûkunca zikr olunan Erzurum kazâsı kurâsından tasarrufunda olan Çul Ahmed nâm karye sınırı dâhilinde vâki‘ her biri lede’l-ahâlî ve’l-cîrân ma‘lûmü’l-hudûd on yedi kıt‘a tarlalar ve iki kıt‘a çayır yerlerini yüz guruş bedel mukābelesinde mezbûr Osman Çelebi’ye bâ-ma‘rifet-i sâhib-i arz ferâğ ve tefvîz ve mahallinde kabza mezbûru taslît eylediğinde ol dahi ber-vech-i mübeyyen tefevvüz ve kabûl ve bedel-i mezkûr yüz guruşu vâlidem müvekkilem mezbûreye teslîm eylediğinde ol dahi bi’t-tamâm tesellüm ve ahz u kabz eyledi min-ba‘d zikr olunan on yedi kıt‘a tarlalar ve iki kıt‘a çayırlar mezbûr Osman Çelebi’nin dâhil-i havza-i tasarrufu olup müvekkilem mezbûrenin alâkası kalmamışdır dedikde gıbbe’t-tasdîkı’l-mu‘teber mâ-vaka‘a bi’t-taleb ketb olundu. Fî 28 min-Zilhicce sene 1152. Şuhûdü’l-hâl: Fahrü’l-kuzât Feyzullah b. eş-Şeyh Mehmed, el-Hâc Hasan b. Abdullah, el-Hâc Mehmed b. Mehmed, Mustafa Çelebi Erzurumî, Molla Mehmed Erzurumî, Hüseyin Efendi b. Osman, Molla Abdülkerim, Boşnak Molla Mehmed, Kilâr el-Hâc Osman, Molla İbrahim b. Osman>> Derkenar: Üç kâğıd aşağı sıhhati üzere kayd olundu. Sah.