Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 130 Hüküm no: 82 Orijinal metin no: [12b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Sadık Ağa’nın kiracı olarak oturduğu vakfa ait evin hassa mimarı tarafından keşfi yapılarak tahmini fiyatının belirlenmesi Keşf, bi-imzâ-i efendi Hilâl-i sütûr-ı meymenet-mastûrda münderic olan husûs-ı âti’z-zikrin mahallinde keşf ve tahrîri iltimâs olunmağın cânib-i şer‘-i hatîrden irsâl olunan keşif nâibimiz Hıfzı el-Hâc Mehmed Efendi hâssa mimârı hulefâsından Hüseyin Halîfe b. Ali ile Dârü’s-saltanati’l-aliyye Kostantıniyyetü’l-mahmiyede Yavaşça Şahin mahallesinde vâki‘ zikri câî menzile varıp zeyl-i vesîkada mektûbü’l-esâmî Müslimîn huzûrlarında akd-i meclis-i şer‘-i Nebevî ettikde menzil-i mezbûrun bir tarafı Mehmed Emin Ağa mülkü ve bir tarafı müezzin hânesi ve bir tarafı Mehmed Sadık Ağa mülkü ve bir tarafı tarîk-i hâs ile mahdûd işbu akd-i meclis-i şer‘ olunan Yavaşça Şahin Vakfı’ndan menzilin beher şehr otuz akçe icâre-i müeccelesiyle mutasarrıf bâ‘is-i hâze’l-kitâb Mehmed Sadık Ağa b. Mehmed Emin Ağa taraflarından vekîl-i mu‘teber-i şer‘îleri Abdullah Beyefendi b. Mustafa meclis-i ma‘kūd-ı mezkûrda vakf-ı mezbûr mütevellîsi vekîli ve câbî-i vakf Abdullah Efendi b. Abdülkerim hâzır olduğu halde ikrâr-ı tâm ve takrîr-i kelâm edip müvekkil-i mûmâ-ileyhin taht-ı tasarrufunda olup lâkin menzil-i mezbûrun bi-kazâillâhi te‘âlâ ba‘zı mahalleri münhedim ve ba‘zı mahalleri inhidâma meyl ve mahfûf olmağla mu‘âyene olunup arsası mesâha ve ebniye-i harâbesi takvîm olunmak bi’l-vekâle matlûbumdur dedikde gıbbe’t-tasdîkı’ş-şer‘î mimâr-ı mezbûr mesâha eyledikde tûlen on altı zirâ‘ ve bir başı beş zirâ‘ ve bir başı altı zirâ‘ bi-hesâb-ı terbî‘i doksan üç zirâ‘ olup ve ebniye-i harâbesi kezâlik doksan üç zirâ‘ olmağla ebniye-i mezkûrenin kıymeti beher zirâ‘ı kırkar akçeden üç bin yedi yüz yirmi akçeye mütehammildir deyü mimâr-ı mezbûr ve Müslimûn-ı hâzırûn icmâ‘ ve ittifâk eylediklerin mevlânâ-yı mezbûr mahallinde ketb ma‘an meb‘ûs Çukadâr Abbas ve Muhzır Mustafa ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fî 26 min-Zilhicce sene 1152. Şuhûdü’l-hâl: Akif Mehmed Efendi, Ali Efendi b. (°), Hüseyin Çelebi bostânî, İbrahim Çelebi b. Ömer, Mehmed Ağa b. (°), Mehmed Ağa b. Ahmed