Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 131 Hüküm no: 83 Orijinal metin no: [12b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Bey’in evini Osman Ağa’ya sattığı Mübâya‘a-i menzil Mahmiye-i İstanbul’da İbrahim Çavuş mahallesinde sâkin Osman Bey b. Ömer nâm kimesne meclis-i şer‘-i hatîr-ı lâzımü’t-tevkīrde Dergâh-ı âlî silahdârân ocağı çavuşlarından bâ‘isü’l-kitâb Osman Ağa b. İbrahim mahzarında ikrâr ve takrîr-i kelâm edip mahalle-i mezbûrede vâki‘ bir tarafdan İbrahim Efendi mülkü ve bir tarafdan ba‘zan Hasan Efendi mülkü ve ba‘zan Kara Mehmed nâm müteveffânın veresesi yedlerinde olan mülk menzil ve bir tarafdan merhûme Fâtıma Hatun veresesi menzilleri ve bir tarafdan tarîk-i âm ile mahdûd fevkānî iki bâb oda ve bir sofa ve dehliz ve tahtânî iki bâb oda ve bir matbah ve kenîf ve bi’r-i mâ ve bahçeyi müştemil menzilin sokak kapısı cânibinde tûlen ve arzen bi-hesâb-ı terbî‘î yetmiş zirâ‘ arsası mahalle-i mezbûre avârızı vakfından bi’l-icâreteyn tasarrufumda ve mâ‘adâ bi’l-cümle arsa ve ebniyesi yedimde mülk ve hakkım olmağla ber-vech-i muharrer arsa ve ebniye-i memlûkemi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Osman Ağa’ya dört yüz yetmiş guruşa bey‘ ve temlîk ve teslîm ve arsa-i mevkūfe-i mezkûreyi dahi bâ-ma‘rifet-i mütevellî-yi vakf otuz guruş bedel mukābelesinde ferâğ ve tefvîz eylediğimde ol dahi ber-minvâl-i muharrer iştirâ ve temellük ve tesellüm ve tefevvüz ve kabz ve kabûl eylediğinden sonra semen-i mezbûr dört yüz yetmiş guruş ile bedel-i merkūm otuz guruş ki cem‘an beş yüz guruşu mezbûr Osman Ağa bana def‘ ü teslîm ben dahi yedinden tamâmen ahz u kabz eyledim ba‘de’l-yevm menzil-i mahdûd-ı mezkûrda benim kat‘an alâka ve medhalim kalmayıp mezbûr Osman Ağa’nın mülk-i müşterâsı ve dâhil-i havza-i tasarrufu olmuşdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 28 min-Zilhicce sene 1152. Şuhûdü’l-hâl: Habib Ağa b. Mehmed Çavuş, Osman Ağa b. Ali Çavuş, Hasan Ağa b. Ramazan Çavuş, Kalaycı es-Seyyid Halil b. Ahmed, Kara Ali Ağa b. İbrahim Çavuş, İsmail Çelebi el-mütevellî, Yazıcı Süleyman Çelebi b. Abdullah