Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 131 Hüküm no: 84 Orijinal metin no: [12b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha bt. Ali’nin yeni doğan çocuğuna nafaka takdiri Nafaka-i haml Mahmiye-i İstanbul’da Sancakdâr Hayreddin mahallesi sâkinelerinden olup zâtı mahalle-i mezbûre imâmı Mehmed Efendi b. Mehmed ve Molla Abdullah b. Osman ta‘rîfleriyle mu‘arrefe olan işbu bâ‘isetü’l-vesîka Saliha bt. Ali nâm hatun meclis-i şer‘-i şerîf-i enverde zevc-i mutallıkı Hüseyin b. Mehmed mahzarında takrîr-i kelâm ve ta‘bîr ani’l-merâm edip mezbûr Hüseyin’in firâşından hâsıl hamlim zuhûr etmeğin vaz‘-ı haml ile iddetim münkazıye oluncaya değin mezbûr Hüseyin üzerine kıbel-i şer‘den kadr-ı kifâye nafaka-bahâ farz ve takdîr olunmak matlûbumdur dedikde gıbbe’t-tasdîkı’ş-şer‘î hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi mezbûre Saliha’nın nafakası’çün mezbûr Hüseyin üzerine târîh-i kitâbdan bi’t-terâzi küll-i yevm üçer para farz ve takdîr buyurup meblağ-ı mefrûz-ı mezbûr üçer parayı mezbûre Saliha’nın nafakasına harc ü sarfa ve lede’l-iktizâ istidâneye ve inde’z-zafer mezbûr Hüseyin üzerine rücû‘a mezbûre Saliha’ya izin birle mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Zilhicceti’ş-şerîfe sene 1152. Şuhûdü’l-hâl: Mahalle-i mezbûre imâmı Mehmed Efendi b. Mehmed, Halil Çelebi b. Mustafa, Osman b. İsmail, Halil b. Ali, Abdullah Efendi b. Osman, Molla Mustafa b. Derviş, Hüseyin Çavuş Ağa