Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 70 Hüküm no: 63 Orijinal metin no: [12b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukıye Hanım’ın mülkü olan dut bağını Mehmed Beşe’ye sattığı Medîne-i Üsküdar’a muzâfe Adalar nâhiyesine tâbi‘ Dolayoba karyesinde sâkine Rukıye bt. Şapşal Halil Beşe nâm hatun tarafından ber-vech-i âti’l-beyanda vekîl olduğu zât-ı mezbûreyi bi’l-ma‘rifeti’ş-şer‘iye ârifân İmam Abdülfettah Efendi b. el-imam Veliyüddin Efendi ve İsmailoğlu Mehmed Beşe b. Mustafa ve Kalyoncu Mehmed Beşe b. Salih şehâdetleri[yle] sâbitü’l-vekâlesi babası merkūm Halil Beşe b. Ahmed meclis-i şer‘-i hatîr-i lâzimü’t-tevkīrde işbu bâ‘isü’l-vesîka Kurdoğlu Mehmed b. Hüseyin mahzarında bi’l-vekâle ikrâr ve takrîr-i kelâm edüp akd-i âti’z-zikrin sudûruna değin müvekkilem kızım mezbûrenin yedinde mülkü olup Pendik karyesi toprağında Tavşantepe nâm mevzi‘de vâki‘ bir tarafı Yeniköylü Mustafa bağı ve bir tarafı Nalbandoğlu tarlası ve bir tarafı Kanber İsmail tarlası ve bir tarafı tarîk-i âm ile mahdûd tahmînen on iki dönüm kürûmî mülk bir kıt‘a koca dut bağı tarafeynden îcâb ve kabûlü hâvî şurût-ı mu‘ayyeneden [müfsideden] [ârî] bey‘-i bâtt-ı sahîh-i şer‘î ile müşterî-i mezbûra altmış guruşa bey‘ u teslîm ve temlîk edüp ol dahi ber-vech-i muharrer iştirâ ve tesellüm ve kabz u kabûl eyledikden sonra semeni olan meblağ-ı mezkûr altmış guruşu müşterî-i mezbûr yedinden müvekkilem kızım mezbûre tamâmen ahz ü kabz eyleyüp fîmâ-ba‘d bağ-ı mahdûd-ı mezkûrda vechen mine’l-vücûh ve sebeben mine’l-esbâb kat‘â ve kātıbeten müvekilem kızım mezbûrenin alâka ve medhali kalmayup müşterî-i mezbûr Mehmed Beşe’nin mülk-i müşterâsı ve hakk-ı sırf-ı mahzı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 29 Recebi’l-ferd sene [1]179 Şuhûdü’l-hâl: Ahmed Efendi, Arnavud Ali Beşe, el-Hâc Ahmed oğlu Mehmed Beşe, el-Hâc Süleyman b. Ahmed, Halil Beşe b. Ahmed, Rasuloğlu Hüseyin, Mustafa Beşe b. Ahmed, İmam vekîli Osman Efendi, Serdâr-ı sâbık Mehmed Ağa, Kayseriyeli Mehmed.