Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 311 Hüküm no: 448 Orijinal metin no: [66a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsak’ın borcuna kefil olan Şabatay v. Menekşe’nin parayı borçlu olduğu Halil b. İbrahim’e ödemesi Vilâyet-i Anadolu’da İnebolu nâm kasabada sâkin işbu bâ‘isü’l-kitâb Halil b. İbrahim mahfil-i kazâda Şabatay v. Menekşe nâm Yahûdi’yi ihzâr ve üzerine da‘vâ edip gāib ani’l-meclis İsak nâm Yahûdi zimmetinde Tosya sofu bahâsından kırk beş riyâlî guruş hakkım olup meblağ-ı mezbûrun cem‘îsine mezbûr Şabatay ile gāib-i mezbûrun zevcesi herbiri emr ve kabûlü hâviye kefâlet ile kefîl bi’l-mâl olmuşlar idi. Hâlâ kefâleti hasebiyle mezbûr Şabatay’dan taleb ederim suâl olunsun dedikde, gıbbe’s-suâl ve akībe’l-inkâr müdde‘î-i mezbûrdan beyyine taleb olundukda udûl-i ricâlden Mehmed Beşe b. Receb ve Hasan Beşe b. Osman nâm kimesneler li-ecli’ş-şehâde hâzırân olup istişhâd olunduklarında fi’l-hakīka müdde‘î-i mezbûrun merkūm İsak zimmetinde olan meblağ-ı mezbûr kırk beş guruş hakkının cem‘îsine mezbûr Şabatay ve gāib-i mezbûrun zevcesi herbiri emr ve kabûlü hâviye kefâlet ile bizim huzûrumuzda kefîl oldular, biz bu husûsa şâhidleriz şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince hüküm-birle mâ-vaka‘a gıbbe’t-taleb ketb olundu. Fi’l-yevmi’l-âşir min-Şevvâli’l-mükerrem li-sene erba‘a ve sittin ve elf. Şuhûdü’l-hâl: el-Hâc Şa‘ban b. Ahmed, Mehmed b. Abdullah, Mehmed Çelebi b. Ali ve gayruhum.