Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 132 Hüküm no: 85 Orijinal metin no: [12b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Ahmed’in oğlu Abdullah’a nafaka takdiri Nafaka Mahmiye-i İstanbul’da Karagümrük kurbünde Karabaş mahallesi sâkinelerinden olup zâtı ta‘rîf-i şer‘î ile mu‘arrefe olan sâhibetü hâzihi’l-vesîka Fâtıma bt. Ahmed nâm hatun meclis-i şer‘-i şerîf-i enverde zevc-i sâbıkı İbrahim Beşe b. Hasan nâm kimesne mahzarında takrîr-i kelâm ve ta‘bîr ani’l-merâm edip mezbûr İbrahim Beşe’nin firâşından hâsıl ve benden mütevellid ve bi-hakkı’l-hıdâne hacr ve terbiyemde olan işbu oğlum Abdullah nâm sagīrin nafaka ve kisveye eşedd-i ihtiyâcı olmağla sagīr-i mezbûrun nafaka ve kisvesi’çün babası mezbûr İbrahim Beşe üzerine kıbel-i şer‘den kadr-ı kifâye nafaka ve kisve-bahâ farz ve takdîr olunmak matlûbumdur de[dik]de gıbbe’t-tasdîkı’ş-şer‘î hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīr-i mezbûrun nafaka ve kisvesi’çün babası mezbûr İbrahim Beşe üzerine târîh-i vesîkadan bi’t-terâzi yevmî beşer akçe nafaka ve kisve-bahâ farz ve takdîr edip meblağ-ı mefrûz-ı mezbûru sagīr-i mezbûr Abdullah’ın nafaka ve kisvesine harc ü sarfa ve lede’l-iktizâ istidâneye ve inde’z-zafer babası mezbûr İbrahim Beşe üzerine rücû‘a mezbûre Fâtıma Hatun’a izin birle mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min-Zilhicceti’ş-şerîfe li-sene isneyn ve hamsîn ve mi’e ve elf. Şuhûdü’l-hâl: el-Hâc İbrahim b. Abdurrahman, Tahtacı İbrahim Ağa, Muhzır el-Hâc Mustafa b. el-Hâc Mehmed, Keşif Muhzırı Mustafa b. Derviş Mehmed, Muhzır el-Hâc Ahmed b. Mehmed, el-Hâc Ahmed b. el-Hâc Mehmed