Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 133 Hüküm no: 87 Orijinal metin no: [13a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Mehmed’in eve ait hissesini diğer Emine Hatun’a sattığı Mübâya‘a Mahmiye-i İstanbul’da Tercümân Yunus mahallesinde sâkine olup zâtı Hâfız Ahmed Efendi b. Mustafa ve İbrahim Çelebi b. Ömer ta‘rîfleriyle mu‘arrefe olan Emine bt. Mehmed nâm hatun meclis-i şer‘-i şerîf-i enverde bâ‘isetü hâzihi’l-vesîka Emine bt. diğer Mehmed nâm hatunun zevci ve tarafından ikrâr-ı âti’z-zikri tasdîka vekîl olduğu mu‘arrifân-ı mezbûrân şehâdetleriyle sâbit olan Hüseyin Beşe b. Mustafa mahzarında ikrâr ve takrîr-i kelâm edip mahalle-i mezbûrede vâki‘ bir tarafdan ba‘zan Devlet Hatun nâm sâhibetü’l-hayrın vakfı müsakkafâtından müteehhilîn odaları ve ba‘zan Ahmed Efendi veresesi ve ba‘zan el-Hâc Receb veresesi menzilleri ve bir tarafdan es-Seyyid Mehmed Çelebi ve bir tarafdan ba‘zan yine mezbûr es-Seyyid Mehmed Çelebi ve ba‘zan diğer Mehmed Çelebi ve ba‘zan İbrahim Çelebi tasarrufunda olan vakıf menzil ve ba‘zan Hüseyin Çelebi nâm kimesne mülkü ve ba‘zan tarîk-i âm ile mahdûd fevkānî iki bâb oda ve dehliz ve tahtânî bir kenîf ve iki bi’r-i mâ ile eşcâr-ı müsmire ve gayr-ı müsmireli bahçeyi müştemil mülk menzilin nısf-ı şâyi‘i benim mülküm ve nısf-ı şâyi‘-i âharı işbu hâzıra bi’l-meclis kız karındaşım Hadîce Hatun’un mülkü olmağla ber-vech-i muharrer mülküm olan nısf-ı şâyi‘i tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûre Hadîce Hatun’un kızı müvekkile-i mezbûre Emine Hatun’a iki yüz otuz beş guruşa bey‘ ve temlîk eylediğimde ol dahi ber-minvâl-i muharrer iştirâ ve temellük ve kabûl eylediğinden sonra semeni olan meblağ-ı mezbûr iki yüz otuz beş guruşu müvekkile-i mezbûre Emine Hatun bana def‘ ü teslîm ben dahi yedinden tamâmen ahz u kabz eyledim ba‘de’l-yevm zikr olunan menzil-i mahdûd-ı mezkûrun nısf-ı şâyi‘inde benim alâka ve medhalim kalmayıp müvekkile-i mezbûre Emine Hatun’un mülk-i müşterâsı olmuşdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 29 min-Zilhicce sene 1152. Şuhûdü’l-hâl: Hâfız Mehmed Efendi b. Mustafa Efendi imâm-ı mahalle-i Hoca Üveys, Molla Mustafa b. Hâfız Efendi el-müezzin, Molla Mehmed b. Mustafa kayyım, Ali Ağa b. Ahmed