Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 134 Hüküm no: 88 Orijinal metin no: [13a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Mustafa’nın evini Ayşe bt. Abdullah’a sattığı Mübâya‘a Mahmiye-i İstanbul’da Yenibahçe kurbünde Attâr Halil mahallesinde sâkine ve zâtı es-Seyyid Mustafa Efendi b. Cemaleddin ve Hasan Odabaşı b. Mehmed nâm kimesneler ta‘rîfleriyle mu‘arrefe olan Emine bt. Mustafa nâm hatun meclis-i şer‘-i hatîr-ı lâzımü’t-tevkīrde yine zâtı mu‘arrifân mezbûrân ta‘rîfleriyle mu‘arrefe olan işbu râfi‘atü’l-kitâb Âişe bt. Abdullah nâm hatun mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan Kalaycı İbrahim menzili ve bir tarafdan Fâtıma Hatun menzili ve bir tarafdan Zeyneb Hatun menzili ve bir tarafdan tarîk-i hâs ile mahdûd tahtânî bir bâb oda ve bir sofa ve kenîf ve müşterek bi’r-i mâ ve bir mikdâr bahçeyi müştemil mülk menzilimi cemî‘ tevâbi‘ ve levâhıkı ve kâffe-i hukūk ve merâfıkıyla tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile merkūm Âişe Hatun’a seksen guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr seksen guruş mutâlebesinden merkūme Âişe Hatun’un zimmetini ibrâ-i âmm-ı katı‘u’n-nizâ‘la ibrâ ve ıskāt eyledim ba‘de’l-yevm menzil-i mahdûd-ı mezkûrda kat‘an alâka ve medhalim kalmayıp merkūme Âişe Hatun’un mülk-i müşterâsı olmuşdur keyfe mâ teşâ ve tehtâr mutasarrıfa olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-Zilhicceti’ş-şerîfe sene 1152. Şuhûdü’l-hâl: es-Seyyid Mustafa Efendi b. es-Seyyid Cemaleddin, Müezzin es-Seyyid Mehmed b. es-Seyyid Mustafa, Hasan Odabaşı b. Mehmed, Mustafa Çelebi b. Hüseyin, İsmail Çelebi b. Yusuf, Mustafa Çelebi b. Yusuf