Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 135 Hüküm no: 89 Orijinal metin no: [13a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman ve kardeşi Hasan’ın Mehmed Efendi Vakfı’na ait evde sırayla oturdukları Muhâyee Mahmiye-i İstanbul’da Küçük Langa kurbünde sâkin Süleyman b. Veliyüddin nâm kimesne meclis-i şer‘-i hatîr-ı lâzımü’t-tevkīrde bâ‘isü’l-kitâb li-ebeveyn er karındaşı Hasan nâm kimesne mahzarında ikrâr ve takrîr-i kelâm edip zikr olunan Küçük Langa kurbünde vâki‘ merhûm Mehmed Efendi nâm sâhibü’l-hayrın vakfı müsakkafâtından bir bâb menzilin üç sehm i‘tibâriyle bir sehmi benim ve iki sehmi mezbûr Hasan’ın bi’l-icâreteyn tasarrufumda sekiz seneden berü menzil-i mezbûrda ben sâkin olup lâkin menzil-i mezbûr kābil-i taksîm olmamağla muhâyee iktizâ etmeğin ben menzil-i mezbûrdan çıkıp târîh-i kitâbdan iki sene tamâmına değin bi’l-muhâye karındaşım mezbûr Hasan sâkin oldukdan sonra bir sene dahi ben sâkin olmak üzere beynimizde terâzi ve tevâfuk eyledik dedikde mezbûr Hasan dahi mukırr-ı mezbûr Süleyman’ı ikrâr-ı meşrûhunda vicâhen tahkīk ve şifâhen tasdîk etmeğin mâ-hüve’l-vâki‘ bi’t-taleb ketb olundu. Fi[‘l-yevmi]’t-tâsi‘ ve’l-ışrîn min-Zilhicceti’ş-şerîfe li-sene isneyn ve hamsîn ve mi’e ve elf. Şuhûdü’l-hâl: Mehmed Çelebi b. Abdullah, Ahmed Çelebi b. Süleyman, Hüseyin Çelebi b. el-Hâc Mehmed.