Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 135 Hüküm no: 90 Orijinal metin no: [13a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Hatice’nin istiğlâl yoluyla Mustafa Ağa’dan borç aldığı İstiğlâl Husûs-ı âti’l-beyânın mahallinde ketb ü tahrîri için bi’l-iltimâs savb-ı şer‘-i enverden irsâl olunan Mevlânâ Ahmed Efendi mahmiye-i İstanbul’da Debbâğzâde mahallesinde vâki‘ Şerife Hadîce bt. eş-Şeyh Ahmed Efendi’nin sâkine olduğu menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde zâtı Müslimîn-i mezkûrîn ta‘rîfleriyle mu‘arrefe olan mezbûre Şerife Hadîce meclis-i ma‘kūd-ı mezkûrda işbu bâ‘isü’l-kitâb Mustafa Ağa b. İsmail nâm kimesne mahzarında ikrâr ve takrîr-i kelâm edip arsası Burusî el-Hâc Ahmed nâm sâhibü’l-hayrın vakfından taht-ı tasarrufumda ve üzerinde olan ebniyesi yedimde mülküm olup mahalle-i mezbûrede vâki‘ bir tarafdan Molla Abdüllatif menzili ve bir tarafdan ba‘zan Mumcu Ömer Beşe ve ba‘zan Sipâhi menzilleri ve iki tarafdan tarîk-i âm ile mahdûd büyût-ı adîde ve müştemilât-ı sâire-i ma‘lûmeyi hâvî işbu akd-i meclis-i şer‘ olunan menzilimin ebniye-i memlûkesini bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık mezbûr Mustafa Ağa’ya iki yüz yirmi guruşa bi-tarîkı’l-istiğlâl bey‘ ve teslîm eylediğimde ol dahi ber-vech-i muharrer iştirâ ve tesellüm ve kabûl ve semeni olan meblağ-ı mezbûr iki yüz yirmi guruşu bana teslîm eylediğimde ben dahi yedinden bi’t-tamâm ahz u kabz eylediğimden sonra mezbûr Mustafa Ağa menzil-i mahdûd-ı mezkûru ba‘de’t-tahliyeti’ş-şer‘iyye ve’t-tekābuzü’l-mer‘î işbu târîh-i kitâbdan bir sene tamâmına değin kırk guruşa bana îcâr ve teslîm eylediğinde ben dahi [13b] ber-minvâl-i muharrer istîcâr ve tesellüm ve kabûl eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an mürsel ümenâ-i şer‘le meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fî-gurreti Muharremi’l-harâm sene 1153. Şuhûdü’l-hâl: el-Hâc Mustafa b. Mehmed, Molla Hüseyin b. Süleyman, Mustafa Ağa b. İsmail, Ali Efendi b. Mehmed, el-Hâc Mustafa b. Abdullah aşçı, Kara Mehmed b. Abdullah