Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 136 Hüküm no: 91 Orijinal metin no: [13b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmihan bt. Yusuf’un eşi Ali’den muhâlaa yoluyla boşandığı Muhâla‘a Mahmiye-i İstanbul’da Öksüzce mahallesinde sâkine olup zâtı Hasan b. Mehmed ve Ali b. Mustafa ta‘rîfleriyle mu‘arrefe olan İsmihan bt. Yusuf nâm hatun meclis-i şer‘-i şerîf-i enverde zevc-i dâhili bâ‘isü’l-kitâb Ali b. İbrahim nâm kimesne tarafından hul‘-ı âti’z-zikri tasdîka vekîl olduğu yine mu‘arrifân-ı mezbûrân Hasan b. Mehmed ve Ali b. Mustafa şehâdetleriyle sâbit olan babası mezbûr İbrahim b. Mehmed mahzarında ikrâr-ı tâm ve takrîr-i kelâm edip müvekkil-i mezbûr Ali zevcim olup beynimizde hüsn-i mu‘âşeretimiz olmamağla zimmetinde mütekarrer ve ma‘kūdün-aleyh olan üç bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzere mezbûr İbrahim ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-i mezbûru ba‘de’l-kabûl hukūk-ı zevciyete müte‘allıka âmme-i da‘vâdan müvekkil-i mezbûr Ali’nin zimmetini ibrâ-i âmm-ı katı‘u’n-nizâ‘la ibrâ ve ıskāt eylediğimde mezbûr İbrahim dahi kezâlik hukūk-ı zevciyete müte‘allıka âmme-i da‘vâdan bi’l-vekâle benim zimmetimi ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 29 min-Zilhicce sene 1152. Şuhûdü’l-hâl: Ali Çelebi b. Abdullah, Molla Hüseyin du‘âcı, Mehmed Çelebi b. Abdullah, es-Seyyid Mustafa b. es-Seyyid Hasan