Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 312 Hüküm no: 449 Orijinal metin no: [66a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şeyh Mehmed’in Hasan b. Yusuf’a olan borcunu Receb’e havale ettiği Esirci tâifesinden Hasan b. Yusuf mahfil-i kazâda işbu bâ‘isü’l-kitâb Şeyh Mehmed b. Abdülmelik mahzarında üzerine da‘vâ edip mezbûr Şeyh Mehmed’e târîh-i kitâbdan bir sene mukaddem evsâfı beynimizde ma‘lûme Rusiyyetü’l-asl Şahbaz nâm çengi câriyemi yüz otuz iki guruşa bey‘ ve teslîm ol dahi iştirâ ve tesellüm eyledikden sonra semeni olan meblağ-ı mezbûrdan yirmi guruş kıymetli bir re’s bargîrini ahz u kabz edip bâkī kalan yüz on iki guruş hakkımı taleb ederim, suâl olunsun dedikde gıbbe’s-suâl mezbûr Şeyh Mehmed cevâbında fi’l-vâki‘ müdde‘î-i merkūma vech-i muharrer üzere iştirâ eylediğim câriye bahâsından <> yüz on iki guruş deynim olup lâkin zikrolunan câriye bahâsından gāib ani’l-meclis Şeyh Mehmed’e yüz guruş hakkım olup ve yine gāib ani’l-meclis Receb nâm kimesnede dahi on iki guruş hakkım olup cem‘an yüz on iki guruşu üçümüzün rızâsıyla havâle-i sahîha-i şer‘iyye ile havâle, merkūm Hasan [66b] dahi ol vechile havâleyi kabûl edip zimmetim berî olmuşdur deyicek gıbbe’l-inkâr mezbûr Şeyh Mehmed’den takrîrine muvâfık beyyine taleb olundukda udûl-i Müslimînden es-Seyyid Mehmed Çelebi b. es-Seyyid Hamza ve el-Hâc İbrahim b. Kasım nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Şeyh Mehmed yüz on iki guruş deynini gāibân-ı merkūmândan bizim huzûrumuzda merkūm Hasan’a havâle-i sahîha-i şer‘iyye ile havâle edip ol dahi havaleyi kabûl eyledi, biz bu husûsa şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye müdde‘î-i mezbûr talebiyle şâhidân-ı mezbûrân şehâdetlerinde kâzib olmadıklarına yemîn teklîf olundukda hasebi’l-mesûl half bi’llâhi te‘âlâ eylediklerinde şehâdetleri makbûle olmağın mûcebince müdde‘î-i mezbûr bî-vech ta‘arruzdan men‘ olunup mâ-hüve’l-vâki‘ bi’t-taleb ketb ü sebt olundu. Fi’l-yevmi’l-âşir min-Şevvâli’l-mükerrem li-sene erba‘a ve sittin ve elf. Şuhûdü’l-hâl: İbrahim Çelebi b. Davud, Ahmed Çelebi b. Hüseyin, Mehmed Çelebi b. Hüseyin, Mehmed b. Abdullah ve gayruhum mine’l-huzzâr.