Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 138 Hüküm no: 94 Orijinal metin no: [13b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Ali’nin eşi Abdullah ile boşandıkları Muhâla‘a Mahmiye-i İstanbul’da Topkapısı kurbünde Bayezid Ağa mahallesinde sâkine zâtı Yusuf b. el-Hâc Mehmed ve Hasan b. Abdullah nâm kimesneler ta‘rîfleriyle mu‘arrefe olan Fâtıma bt. Ali nâm hatun meclis-i şer‘-i şerîf-i enverde zevc-i dâhili [sâhib-i] hâze’l-kitâb Abdullah b. Ali nâm kimesne mahzarında ikrâr ve takrîr-i kelâm edip mezbûr Abdullah zevcim olup beynimizde hüsn-i mu‘âşeretimiz olmamağla zimmetinde mütekarrer ve ma‘kūdün-aleyh olan altı bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve mezbûrun firâşından hâsıl ve benden mütevellid hâlâ bi-hakkı’l-hıdâne hacr ve terbiyemde olan işbu sagīr oğlu Eyüb’ün dahi hakk-ı hıdânesi sukūtuna değin kendi mâlımdan infâk ve iksâ edip me’ûnet-i süknâm dahi kendi üzerime olmak üzere zevcim mezbûr Abdullah ile muhâla‘a-i sâhîha-i şer‘iyye ile hul‘ olduğumda ol dahi ber-vech-i muharrer hul‘-i mezbûru ba‘de’l-kabûl hukūk-ı zevciyete müte‘allıka âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-selhi Zilhicceti’ş-şerîfe sene 1152. Şuhûdü’l-hâl: Yusuf b. Hacı Mehmed, Hasan b. Ezelhan, Mehmed b. Mustafa, Mustafa b. Mehmed