Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 139 Hüküm no: 95 Orijinal metin no: [14a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İran asıllı köleler ferman ile azat edildiğinden, Hatice’nin de azat edilmesi İkrâr-ı Acem Sâbıkā rıkkıyetini mu‘terife ve ber-vech-i âtî kıbel-i şer‘den da‘vâya me’zûne olan uzun boylu, kara kaşlı, kara gözlü, Acemiyyetü’l-asl Müslimetü’n-neseb bâ‘isetü hâzihi’l-vesîka Kanuşer nâm-ı diğer Hadîce meclis-i şer‘-i hatîr-ı lâzımü’t-tevkīrde kendüye rakīkası olmak üzere vaz‘-ı yed eden Rukiye bt. Mustafa b. Abdurrahman nâm hatunun babası ve tarafından zikri âtî husûsa vekîl olduğu ber-nehc-i şer‘î sâbit olan mezbûr Mustafa muvâcehesinde üzerine da‘vâ ve takrîr-i kelâm edip ben vilâyet-i İran’da medîne-i Nahcivan mahallâtından Han Hamamı mahallesi ahâlîsinden Acemiyyü’l-asl Müslimü’n-neseb Mehmed b. Mustafa’nın firâşından hâsıla ve zevce-i menkûhası Safiye bt. Abdullah’dan mütevellide olup bâ-fermân-ı âlî sebîlleri tahliye olunan Müslimetü’n-neseb Acem cinsinden iken müvekkile-i mezbûre bana rakīkası olmak zu‘muyla vaz‘-ı yed eder suâl olunup sebîlim tahliye birle müvekkile-i mezbûrenin kasr-ı yedine tenbîh olunmak murâdımdır dedikde gıbbe’s-suâl vekîl-i mezbûr Mustafa cevâbında fi’l-vâki‘ mevsûfe-i mezbûre Kanuşer nâm-ı diğer Hadîce vech-i muharrer üzere bâ-fermân-ı âlî sebîlleri tahliye olunan Müslimetü’n-neseb Acem cinsinden olduğunu bi’l-vekâle ikrâr ve i‘tirâf etmeğin alâ-mûcebi i‘tirâfihî mevsûfe-i mezbûrenin ber-mûceb-i fermân-ı âlî sebîli tahliye birle mâ-vaka‘a bi’t-taleb ketb olundu. Fî-gurreti Muharremi’l-harâm sene 1153. Şuhûdü’l-hâl: Mehmed Çelebi b. Abdullah, Hüseyin Çelebi b. Hacı Mehmed, Ahmed Çelebi b. Şa‘bân, Ali Çelebi b. Abdullah