Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 139 Hüküm no: 96 Orijinal metin no: [14a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asvador’un çocukları Hodas ve Elyasa’ya nafaka takdiri Nafaka Mahmiye-i İstanbul’da Molla Aşkī mahallesinde mütemekkin işbu bâ‘isü’s-sifr Asvador v. Avanes nâm zimmî meclis-i şer‘-i hatîr-ı lâzımü’t-tevkīrde sulbî kebîr oğulları Hodas ve Elyasa nâm zimmîler muvâcehelerinde takrîr-i kelâm ve bast-ı merâm edip ben pîr-i fânî ve amel-mânde ve kâr [u] kisbe iktidârım olmadığından mu‘dim ve mu‘sir olmamla nafakaya eşedd-i ihtiyâcım olmağla oğullarım mesfûrân Hodas ve Elyasa nâm zimmîler üzerine kıbel-i şer‘den kadr-ı ma‘rûf nafaka-bahâ farz ve takdîr olunmak matlûbumdur dedikde gıbbe’t-tasdîkı’ş-şer‘î hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi merkūm Asvador’un nafakası’çün oğullarım mesfûrân Hodas ve İsa üzerlerine bi’t-terâzi târîh-i kitâbdan her birine üçer paradan cem‘an altı para nafaka-bahâ farz ve takdîr buyurup meblağ-ı mefrûz-ı mezbûru merkūm Asvador zimmînin nafakasına harc ü sarfa ve lede’l-iktizâ istidâneye ve inde’z-zafer oğulları mesfûrân Hodas ve Elyasa nâm zimmîler üzerlerine rücû‘a merkūm Asvador zimmîye izin birle mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min-Zilhicceti’ş-şerîfe sene 1152. Şuhûdü’l-hâl: Mehmed b. Mustafa, es-Seyyid Abdulkadir b. İbrahim, es-Seyyid Ali b. Mustafa, es-Seyyid Mustafa b. Hasan, Mehmed b. İbrahim, Mustafa b. Mehmed, Hasan b. Mehmed, diğer Hasan b. İbrahim