Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 140 Hüküm no: 97 Orijinal metin no: [14a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Odabaşı’ya ait olup Hüseyin Beşe’de bulunan bargirin sahibine verilmesi İstihkāk-ı bargir Dergâh-ı âlî -dâme mahfûfen bi’l-me‘âlî- yeniçerilerinin on dördüncü bölüğe mahsûs oda neferâtının nukūd-ı mevkūfesine bi’l-fi‘il mütevellî olan Ali Odabaşı b. Mehmed nâm kimesne meclis-i şer‘-i şerîf-i enverde canbaz tâifesinden Hüseyin Beşe b. Abdünnebi nâm kimesne mahzarında bi’t-tevliye üzerine da‘vâ ve takrîr-i kelâm edip işbu mu‘âyene olunan doru bargiri târîh-i kitâbdan beş ay mukaddem sefer avdetinde Silivri sahrâsında zâyi‘ etmiş idim hâlâ mezbûr Hüseyin Beşe’nin yedinde buldum, bi’t-tevliye istihkākan taleb ederim suâl olunsun dedikde gıbbe’s-suâl merkūm Hüseyin Beşe cevâbında zikr olunan bargiri bundan akdem gāib ani’l-meclis ismi ma‘lûmum olmayan Arnavud tâifesinden bir kimesneden yirmi yedi guruş bir rub‘ guruş semen-i medfû‘ ve makbûza iştirâ edip mülk-i müşterâsı olduğunu ikrâr mâ‘adâyı inkâr edicek müdde‘î-i mezbûr Ali Odabaşı’dan ber-minvâl-i muharrer müdde‘âsına mutâbık beyyine taleb olundukda udûl-ı ahrâr-ı ricâl-i Müslimînden olup yine Dergâh-ı âlî yeniçerileri odalarında sâkinler Mustafa Beşe b. Hüseyin ve diğer Mustafa Beşe b. Ahmed nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka işbu mu‘âyene olunan doru bargiri mütevellî-yi merkūm Ali Odabaşı b. Mehmed mütevellîsi olduğu dördüncü bölüğe mahsûs nukūd-ı mevkūfesiyle iştirâ edip târîh-i kitâbdan beş ay mukaddem sefer avdetinde Silivri sahrâsında zâyi‘ olmuşdur biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince zikr olunan bargiri müdde‘î-i merkūm Ali Odabaşı’ya def‘ ve teslîme merkūm Hüseyin Beşe’ye tenbîh birle mâ-vaka‘a bi’t-taleb ketb olundu. Fî 29 min-Zilhicceti’ş-şerîfe sene 1152. Şuhûdü’l-hâl: Mehmed Efendi b. Hasan, Feyzullah Efendi b. Ebubekir, Mustafa b. Hasan, Mustafa b. Ahmed, Molla Hüseyin du‘âcı