Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 141 Hüküm no: 98 Orijinal metin no: [14a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anton’un varisleri ile Avakot arasındaki davada sulh olunduğu Sulh Vilâyet-i Anadolu’da Eğin kazâsında Venk nâm karye mütemekkinlerinden olup bundan akdem hâlik olan Anton v. Hanes v. Tafal nâm zimmînin verâseti zevce-i menkûha-i metrûkesi Kadar bt. Kostandi ve sulbiye kebîre kızları Sofya ve Nazlı nâm Nasrâniyelere ve li-ebeveyn er karındaşı Mosis ve li-ebeveyn kız karındaşı Meryem’e münhasıra ba‘dehû mezbûr Mosis dahi hâlik olup verâseti sulbî oğlu Yamandi’ye ba‘dehû mezbûr Yamandi dahi hâlik olup verâseti zevcesi Palasan v. Margos nâm Nasrâniye ile sulbî kebîr oğulları Ohan ve Vasil ve sagīr oğlu Yorgaki ve sulbiye sagīre kızları Damlatse ve Maryore’ye münhasıra olduğu ba‘de’t-tahakkukı’ş-şer‘î mezbûre Meryem tarafından husûs-ı âti’l-beyânda ber-vech-i câî da‘vâ ve sulh ve ibrâya vekîl olduğu şahsına ma‘rifet-i şer‘iyye ile ârifân Dimitri v. Habkar ve Hokas v. Oham nâm zimmîler şehâdetleriyle mahzar-ı hasm-ı câhid[de] câi’z-zikrde şer‘an sâbit ve mütehakkık ve sübût-ı vekâletine hükm-i şer‘î lâhık olan Melkon v. İlican nâm zimmî meclis-i şer‘-i şerîf-i enverde sıgār-ı mezbûrenin anaları ve vasiye-i şer‘iyyeleri olan mesfûre Palasan ile mezbûr Vasil taraflarından kezâlik husûs-ı âti’l-beyânda vekîl olduğu şahsını ârifân Dimitri v. Kayser ve Hokas v. Ohan nâm zimmîler şehâdetleriyle şer‘an sâbit olan hâmilü’l-vesîka Avakot v. Vasiyonis ile mezbûr Ohan mahzarlarında bi’l-vekâle ikrâr ve takrîr-i kelâm edip bundan akdem müvekkilem mezbûre Meryem babası mesfûr Handan ve anası Zelal nâm hâlikeden ve hâlik-i mezbûr Anton’dan hisse-i irsiyesini terekelerine vâzı‘u’l-yed olan mesfûr Mosis ile işbu hüccet mantûkunca iki yüz otuz guruş bedeli makbûza alâ-tarîkı’t-tehârüci’ş-şer‘î sulh ve terekelerine müte‘allıka âmme-i da‘vâdan mesfûr Mosis’in zimmetini ibrâ ve ıskāt eyledikden sonra yine müvekkilem mezbûre Meryem li-ebeveyn ammisi Avik nâm hâlikden kendi hisse-i irsiye-i şer‘iyyesini dahi yine terekesine vâzı‘u’l-yed olan mesfûr Mosis’in vekîli Vasil Keşiş nâm zimmî ile yine tarîk-i mezkûr üzere elli guruş bedel-i makbûza bâ-hüccet-i şer‘iyye sulh ve âmme-i da‘vâdan mezbûr Mosis’in zimmetini ibrâ ve ıskāt etmiş idi, lâkin hâlik-i mesfûr Anton’un terekesinden mesfûr Mosis hayâtında ber-mûceb-i defter yirmi beş bin guruş nakid ve yirmi beş bin guruş kıymetli eşyâ-i ma‘lûmeyi mahmiye-i İstanbul’da ahz edip ol vechile bedel-i sulh-ı mezkûr nukūd-ı terekeden müvekkilem mesfûre Meryem’in hissesine isâbet eden mikdârdan ekal olup sulh-ı mezkûr sahîh olmadığına binâen zikr olunan nakid yirmi beş bin guruş ile eşyâ-i merkūmeden hisse-i irsiye-i şâyi‘asını mesfûr Mosis’in tereke-i vâfiyesinden bi’l-vekâle taleb ve da‘vâ eylediğimde onlar dahi inkâr edip benim ber-vech-i muharrer müdde‘âma aslâ beyyinem olmayıp ol vechile ba‘de vukū‘i’l-münâza‘ati’l-kesîre beynimizde muslihûn tavassut edip da‘vâ-yı mezkûremden beni vekîl-i mesfûr Avakin ve asîl-i mesfûr Ohan ile an-inkâr üç yüz elli guruş üzerine sulh eylediklerinde ben dahi ber-vech-i muharrer bi’l-vekâle sulh-ı mezbûru kabûl ve bedel-i sulh olan meblağ-ı mezbûr üç yüz elli guruş için mezbûrûn Palasan v. Vasil ve Ohan’ın mâllarından olmak üzere bi’t-tamâm vekâleten ahz u kabz edip zikr olunan hâliklerin bi’l-cümle terekelerine vesâir cemî‘ mu‘âmelât-ı şettâdan hukūk-ı ma‘lûme ve mechûleye müte‘allıka âmme-i de‘âvî ve mutâlebât [14b] ve kâffe-i eymân ve mutâlebâtdan gerek mesfûr Anton’un veresesi olan zevcesi mesfûre Kadar’ı ve sulbiye kızları mesfûretân Sofya ve Nazlı’nın ve gerek mesfûr Yamandi’nin vârisleri olan zevcesi mesfûre Palasan ve oğulları mesfûrûn Ohan ve Vasil ve Yorgaki ve sulbiye kızları mesfûretân Damlatse ve Maryore’nin cümlesinin zimmetlerini ibrâ-i âmm-ı katı‘u’n-nizâ‘ [ve] râfi‘ü’l-hısâm ile bi’l-vekâle ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-Zilhicceti’ş-şerîfe sene 1152. Şuhûdü’l-hâl: Eğinli Abdurrahman b. Hasan, Hayri Mehmed Efendi b. Mustafa, el-Hâc İsmail b. Ahmed mübâşir, Kurabiyeci Mehmed b. Hasan, el-Hazînedâr Mehmed Ağa b. Halil, Şatır Ömer b. Yusuf, İbrahim b. Abdullah, Helvacı Mustafa b. Mehmed, Metrafan v. Kazar, Naralma v. Kazar, Sarvan v. Kokaz, Modisles v. Bali, Zebtiya v. Ohan, Bedros v. Aleksan, Margos v. Kalas, Kokaz v. Ohan, Dimitri v. Kasber, Nikola v. İlican, Dimitri v. Metrafan