Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 143 Hüküm no: 100 Orijinal metin no: [14b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye bt. Abdullah’ın bostandaki hissesini Süleyman Ağa’ya sattığı Mübâya‘a Mahmiye-i İstanbul’da Molla Şeref mahallesinde sâkin iken bundan akdem fevt olan Kumru Ali Ağa b. Hüseyin b. Halil’in verâseti zevce-i metrûkesi Safiye bt. Abdullah ile sulbî kebîr oğlu Hüseyin’e ve sagīr oğlu Ahmed’e ve kebîre kızları Fâtıma ve Hadîce’ye ve sagīre kızı Âişe’ye münhasıra olup ba‘dehû mezbûre Âişe dahi vefât edip verâseti vâlidesi Meryem bt. Ahmed ile li-ebeveyn kebîr er karındaşı mezbûr Ahmed’e münhasıra ve tashîh-i meseleleri bi-hükmi’l-münâsahati’ş-şer‘iyye kırk sekiz sehmden olup sihâm-ı mezbûreden altı sehmi mezbûretân Fâtıma ve Hadîce’den her birine ve bir sehmi mezbûre Meryem’e isâbeti tahakkukundan sonra mezbûre Safiye bt. Abdullah b. Abdurrahman nâm hatun tarafından husûs-ı âti’z-zikre vekîl olduğu zât-ı mezbûreyi bi’l-ma‘rifeti’ş-şer‘iyye ârifân es-Seyyid Mehmed Çelebi b. es-Seyyid Mehmed ve Molla Habib b. Hüsameddin şehâdetleriyle sâbit olan Molla Süleyman b. Mehmed nâm kimesne meclis-i şer‘-i şerîf-i enverde sâbıkā Turnacıbaşı olan işbu sâhibü’l-kitâb mefharü’l-emâcid ve’l-ekârim Süleyman Ağa b. el-Hâc İbrahim Ağa mahzarında bi’l-vekâle ikrâr ve takrîr-i kelâm edip mahalle-i mezbûrede vâki‘ bir tarafdan Pirincî Hüseyin Efendi bostanı ve bir tarafdan Girid Defterdârı Mehmed Efendi mülkü ve bir tarafdan Ömer Ağa ve Abdullah Efendi [ve] Haffâf Mehmed Çelebi menzilleri ve avârıza mevkūfe menzil ve Kapudan Paşa bahçesi ve bir tarafdan tarîk-i âm ile mahdûd iki dolap kapısı ve bir bahçıvan odası ve kenîf ve eşcâr-ı müsmire ve gayr-ı müsmireyi müştemil mülk bostandan bâlâda tafsîl olunduğu üzere altı sehm hisse-i irsiye-i şer‘iyyesini tarafeynden îcâb ve kabûlü hâvî bey‘-i bâtt-ı sahîh-i şer‘î ile mûmâ-ileyh Süleyman Ağa’ya doksan guruşa bi’l-vekâle bey‘ ve temlîk eylediğimde ol dahi ber-vech-i muharrer iştirâ ve temellük ve kabûl eylediğinden sonra semeni olan meblağ-ı mezbûr doksan guruşu mûmâ-ileyh Süleyman Ağa yedinden tamâmen ahz u kabz eyledim ba‘de’l-yevm bostan-ı mahdûd-ı mezkûrda olan altı sehm hisse-i şâyi‘ada müvekkilem mezbûre Safiye’nin kat‘â alâka ve medhali kalmayıp mûmâ-ileyh Süleyman Ağa’nın mülk-i müşterâsı olmuşdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti Muharremi’l-harâm sene 1153. Şuhûdü’l-hâl: İmâm Mustafa Efendi b. Halil, Câbî Ali Halîfe b. Osman, İbrahim Beşe b. Mustafa, diğer İbrahim b. Zülfikar, Ali Beşe b. Ahmed, Molla Hüseyin b. Hacı Mehmed, Hacı İbrahim b. Abdurrahman