Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 144 Hüküm no: 101 Orijinal metin no: [14b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarı Süleyman’ın vakıf arsa üzerine yaptığı evin, hassa mimarlar tarafından keşfi yapılarak fiyatlandırıldığı Keşf Husûs-ı âti’l-beyânın mahallinde keşf ü tahrîri için kıbel-i şer‘den irsâl olunan keşif nâibimiz Hıfzı el-Hâc Mehmed Efendi hâssa mimâr hulefâsından Yusuf Halîfe b. Mustafa ve Hüseyin Halîfe ile mahmiye-i İstanbul’da Eğrikapı dâhilinde Avcıbey mahallesinde vâki‘ merhûme Fâtıma Hatun’un süknâ ve tevliyeti evlâ[d-ı] atîk ve atîkātına meşrûta olan ma‘lûmü’l-hudûd ve’l-müştemilât menzile varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i Nebevî ettikde işbu bâ‘isü’l-kitâb Sarı Süleyman meclis-i ma‘kūd-ı mezkûrda evlâd-ı atîkātdan vakf-ı mezbûr mütevellîsi Rukiye Hatun hâzıra olduğu halde ikrâr-ı tâm ve takrîr-i kelâm edip işbu akd-i meclis-i şer‘ olunan menzil-i mezkûr müşrif-i harâb ve mâil-i türâb olup kābil-i süknâ olmadığından evlâd-ı atîkātdan olup nevbet-i tasarrufunu ve mütevellî-yi vakf olan Ebubekir b. Mustafa iki sene mukaddem tûlen ve arzen bi-hesâb-ı terbî‘î yüz elli dokuz zirâ‘ arsa ifrâz ve bana li-ecli’t-ta‘mîr yirmi guruş icâre-i mu‘accele ve beher şehr üçer akçe icâre-i müeccele ile îcâr ve tefvîz ve her ne binâ edersen binâsı mülküm olmak üzere izin ve yedime verdiği temessük mantûkunca bi-izni’l-mütevellî me’zûn olduğuma binâen kendi mâlım ile mücerred binâ ve itmâm ve Müslimîn huzûrlarında dahi işhâd etmekle hâliyâ mütevellî-yi vakf Rukiye Hatun kezâlik binâsı mülküm olmak üzere izin ve temessük verilmekle ebniye-i mevcûdesi keşf ve tahmîn-i sahîh ile tahmîn olunmak matlûbumdur dedikde mezbûre mütevellîye Rukiye Hatun ba‘de’t-tasdîk mimârân-ı mezbûrân mesâha eylediklerinde üzeri sakflı dör[t]? şişe? tavanlı etrâfı dolma duvarlı Arabî musandaralı ocaklı cedîd fevkānî bir bâb oda ve bir sofa ve dehliz ve tahtânî mükemmel bir oda ve iki ocak ve müştemilât-ı sâiresiyle tûlen on bir zirâ‘ ve arzen yedi zirâ‘ ve yedi parmak bi-hesâb-ı terbî‘î seksen zirâ‘ beher zirâ‘ üç yüz altmış akçeden yirmi sekiz bin sekiz yüz akçe ve bahçede mükemmel tahta kenîf ber-vech-i tahmîn altı yüz akçe ve Arabî kanadlı mükemmel sokak kapısı ber-vech-i tahmîn bin akçe ve hammâliye ve mesârif-i sâire bin sekiz yüz akçe cem‘an yekûn otuz iki bin iki yüz akçeye bâliğ olup mukaddemâ enkāz-ı atîki tahmîn olundukda bin iki yüz akçeye bâliğ olup meblağ-ı mezbûr aşağı varıldıkda sahîhü’l-bâkī otuz bir bin akçe kalmağla bundan noksân ve ekal ile mümkün değildir deyü mimârân-ı mezbûrân icmâ‘ ve Müslimûn-ı hâzırûn ittifâk eylediklerin mevlânâ-yı mezbûr mahallinde ketb ve ma‘an ba‘s olunan Çukadâr Mehmed ve Muhzır Mustafa ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fî-gurreti Muharremi’l-harâm sene 1153. Şuhûdü’l-hâl: Mustafa b. Mehmed, Ahmed b. İsmail, el-Hâc Mehmed b. Ahmed, el-Hâc İbrahim b. Ali, Mehmed Efendi b. Ali, Müezzin Lütfullah Efendi, Hâfız Mehmed Efendi, Ahmed b. İbrahim, İsmail Efendi b. Ömer