Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 145 Hüküm no: 102 Orijinal metin no: [15a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye Hatun’un kızı Nefise’ye nafaka takdiri Nafaka Mahmiye-i İstanbul’da Hoca Üveys mahallesinde sâkine ve zâtı ta‘rîf-i şer‘î ile mu‘arrefe olan sâhibetü’l-kitâb Rukiye Hatun bt. Abdülbaki Efendi meclis-i şer‘-i hatîr-ı lâzımü’t-tevkīrde takrîr-i kelâm ve ta‘bîr ani’l-merâm edip zevc-i mutallıkım Safed kazâsı muvakkiti olan gāib ani’l-beled Hüseyin Efendi b. Abdullah ile zevciyet beynimizde kāime iken mezbûrun firâşından hâsıla ve benden mütevellide ve bi-hakkı’l-hıdâne hacr ve terbiyemde olan sadriye kızım Nefise nâm sagīrenin mâlı olmayıp nafaka ve kisveye muhtâce olmağın nafaka ve kisve ve sâir havâyic-i lâzımesi’çün cânib-i şer‘-i enverden babası gāib-i mezbûr üzerine kadr-ı ma‘rûf akçe farz ve takdîr olunmak matlûbumdur dedikde merkūme Rukiye’nin takrîri vâkı‘a mutâbık ve zikri âtî takdîr olunan akçe kadr-ı ma‘rûf olduğunu zeyl-i kitâbda muharrerü’l-esâmî Müslimîn bî-garaz Müslimîn ihbârlarıyla merkūme Rukiye Hatun ba‘de’t-tahlîfi’ş-şer‘î bi’l-emr kitâb-ı müstetâbı kalem-i müşkîn rakamlarıyla tezyîn eden hâkim-i hâsım lâ-zâle bâzile’l-mekârim hazretleri sagīre-i mezbûre Nefise’nin nafaka ve kisve ve sâir havâyic-i lâzımesi’çün babası gāib-i mezbûr Hüseyin Efendi üzerine târîh-i kitâbdan yevmî yirmi dörder akçe farz ve takdîr buyurup meblağ-ı mefrûz-ı mezkûr yirmi dörder akçeyi sagīre-i mezbûrenin nafaka ve kisve ve sâir havâyic-i lâzımesine harc ü sarfa ve lede’l-iktizâ istidâneye ve vakt-i zaferde babası gāib-i mezbûrun üzerine rücû‘a merkūme Rukiye Hatun’a izin vermeğin mâ-vaka‘a bi’t-taleb ketb olundu. Fi’l-yevmi’s-sânî min-Muharremi’l-harâm sene 1152. Şuhûdü’l-hâl: Fahrü’l-kuzât Abdullah Efendi b. Hüseyin, Ali Efendi b. Hüseyin, Mehmed Efendi b. Ömer, Osman Efendi b. Mehmed, Ali Efendi b. Ramazan, es-Seyyid Ahmed b. es-Seyyid İsa, Müezzin Hüseyin Halîfe b. Mehmed, el-Hâc Mehmed b. Mustafa Çelebi