Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 145 Hüküm no: 103 Orijinal metin no: [15a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Beşe, Saliha ve Ali’nin evlerini Ahmed Beşe’ye sattıkları Mübâya‘a Mahrûse-i Galata muzâfâtından İstinye nâhiyesine tâbi‘ Kal‘a-i cedîd hâricinde Dere mahallesi sükkânından olup kendiden asîl ve kız karındaşı Saliha bt. İskender b. Abdullah nâm hatun ile Ali Çelebi b. Mustafa b. Abdullah nâm kimesne taraflarından bey‘-i âti’z-zikre vekîl olduğu İsmail Çelebi b. Ali ve Ahmed Beşe b. Mehmed nâm kimesneler şehâdetleriyle sâbit ve sübût-ı vekâletine hükm-i şer‘î lâhık olan Hüseyin Beşe b. el-mezbûr İskender nâm kimesne meclis-i şer‘-i şerîf-i enverde işbu bâ‘isü’l-kitâb Ahmed Beşe b. Mehmed mahzarında bi’l-asâle ve bi’l-vekâle ikrâr-ı tâm ve takrîr-i kelâm edip akd-i âti’z-zikrin sudûruna değin yedimizde mülk ve hakkımız olup mahalle-i mezbûrede vâki‘ etrâf-ı erba‘adan el-Hâc Mehmed ve el-Hâc İbrahim ve Molla oğlu İsmail Beşe ve Osman oğlu Mehmed Reis mülkleri ve tarîk-i âm ile mahdûd fevkānî üç bâb oda ve bir sofa ve tahtında bir ahur ve bir kenîf ve bir bi’r-i mâ ve bir mikdâr bahçeyi müştemil mülk menzilin üç sehm i‘tibâriyle bir sehmi benim ve bir sehmi müvekkillerim mezbûrân Saliha Hatun ve Ali Çelebi’nin vech-i muharrer üzere yedimizde mülk ve hakkımız olmağla menzil-i mahdûd-ı mezkûru alâ mâ yeştemilühû ve yahvîhi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mezbûr Ahmed Beşe’ye bi’l-asâle ve bi’l-vekâle iki yüz altmış guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr iki yüz altmış guruşu mezbûr Ahmed Beşe yedinden asâleten ve vekâleten tamâmen ahz u kabz eyledim ba‘de’l-yevm menzil-i mahdûd-ı mezkûrda benim ve müvekkillerim mezbûrân Saliha ve Ali’nin alâka ve medhalimiz kalmayıp mezbûr Ahmed Beşe’nin mülk-i müşterâsı olmuşdur keyfe mâ yeşâ’ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti Muharrem sene 1153. Şuhûdü’l-hâl: Molla Yusuf b. Abdullah, Ahmed Beşe b. Mehmed, İsmail Beşe b. Mustafa, Hüseyin Beşe b. Hasan, Ahmed Beşe b. Mehmed, Sadeddin Beşe b. Mustafa, Mustafa Beşe b. Abdullah, Mustafa Beşe b. Mustafa, Ser-bölük Mustafa b. Receb, Ser-bölük İbrahim b. Mustafa