Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 146 Hüküm no: 104 Orijinal metin no: [15a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gürcü asıllı Hatice ile azat edilmeden önceki sahibi Bağdasar arasındaki alacak davasında sulh olunduğu Bi-imzâ-i efendi Sulh Mahmiye-i İstanbul’da Ayasofya kurbünde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Oturakçı Osman Ağa mu‘takası demekle ma‘rûfe Gürciyyetü’l-asl Müslimetü’l-millet Hadîce bt. Abdullah nâm hatun meclis-i şer‘-i şerîf-i enverde İngiltere tercümânlarından hâmil-i hâzihi’l-vesîka Bağdasar v. Ferruhzad nâm zimmî mahzarında ikrâr-ı tâm ve takrîr-i kelâm edip bundan akdem ben yedi sene mukaddem merkūm Bağdasar yedinde câriye-i memlûkesi olduğum halde Gürcistan’dan ihrâc edip ol vechile yedimde mâlım olan nakid iki yüz guruş ile dört yüz guruş kıymetli bir elmas yüzüğümü ahz ve beni âhara bey‘ edip hâlâ mu‘taka olduğum ecilden meblağ-ı mezbûr ile zikr olunan yüzüğü mesfûrdan taleb ederim deyü eylediğim da‘vâm meşrû‘a olmayıp ber-mûceb-i i‘lâm bi-gayr-ı vechin mu‘ârazadan men‘ olunmuş idim, el-hâletü hâzihi ben yine da‘vâ-yı mezkûreme tasaddî eylediğimde kat‘-ı nizâ‘ için mesfûr Bağdasar mâlından teberru‘an bana elli guruş def‘ ü teslîm eylediğinde ben dahi bi’t-tamâm ahz u kabz edip gerek husûs-ı mezbûra ve gerek bundan mâ‘adâ kendiden iddi‘â eylediğim otuz guruş kıymetli bir hatâî kaftan ve bir anteriye ve sâir işbu târîh-i vesîkaya gelince cemî‘ mu‘âmelât-ı şettâdan hukūk-ı ma‘lûme ve mechûleye müte‘allıka âmme-i de‘âvî ve mutâlebât ve kâffe-i eymân ve muhâsamâtdan mesfûr Bağdasar’ın zimmetini ibrâ-i âmm-ı katı‘u’n-nizâ‘la ibrâ ve ıskāt eyledim ba‘de’l-yevm mesfûr Bağdasar’da vechen mine’l-vücûh ve sebeben mine’l-esbâb aslâ ve kat‘a bir akçe ve bir habbe hakkım yokdur dedikde mesfûr Bağdasar dahi mukırra-i mezbûre Hadîce’yi cemî‘ kelimât-ı meşrûhasında bi’l-muvâcehe tahkīk ve bi’l-müşâfehe tasdîk etmeğin mâ-vaka‘a bi’t-taleb ketb olundu. Fi’l-yevmi’s-sâlis min-Muharremi’l-harâm sene 1153. Şuhûdü’l-hâl: Salih Ağa b. Süleyman, el-Hâc İbrahim b. Hacı Halil, el-Hâc Hüseyin Ağa, es-Seyyid Mehmed b. es-Seyyid Hasan, el-Hâc İsmail masdariyeci karındaşı, Kisveci Halil Ağa b. (°)