Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 312 Hüküm no: 450 Orijinal metin no: [66b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Ali Ağa’nın Urfa ve Birecik’in avarız ve bedel-i nüzûl vergilerini toplamak üzere vekili olan Hasan Bey’in elinde kalan paraları ödemesi Bundan akdem hâs bostancılar odabaşısı iken müteveffâ olan Ali Ağa’nın ümm-i veledi Hadice’nin mezbûr Ali Ağa’nın karındaşından hâsıl ve zâhir olan hamlin tesviye-i umûruna cânib-i şer‘den mansûb vasî olan işbu bâ‘isü’l-kitâb Ali Bey b. Mehmed mahfil-i şer‘-i şerîfde hâssa bostancılarından Hüseyin Bey b. Mehmed mahzarında ikrâr-ı tâm ve bast-ı merâm kılıp müteveffâ-i mezbûr Ali Ağa hâl-i sıhhatinde vilâyet-i Anadolu’da Ruha ve Birecik kazâlarının tarîh-i kitâb senesine mahsûb olmak üzere avârız ve bedel-i nüzûl hizmetlerini cânib-i mîrîden alıp cem‘ ve tahsîline mezbûr Hasan Bey’i tarafından tevkîl edip mezbûr dahi vekâlet-i merkūmeyi kabûl eyledikden sonra varıp zikrolunan kazâların avârız ve nüzûl mallarını vekâleten cem‘ ve tahsîl edip iki yük doksan sekiz bin iki yüz akçe cem‘ ve tahsîl ve ahz u kabz eyledikden sonra müteveffâ-i mezbûr ile muhâsebesini görmezden mukaddem mezbûr Ali Ağa müteveffâ olmağla zikrolunan hizmetlerden cem‘ ve tahsîl eylediği meblağ-ı mezbûr iki yük doksan sekiz bin iki yüz akçe zimmetinde kalıp meblağ-ı mezbûru mezbûr Hasan Bey’e mürâca‘at etmek üzere cânib-i mîrîden benim mâlımdan ahz u kabz olunmuş idi. Hâlâ ben dahi mezbûr Hasan Bey’e mürâca‘at edip zikrolunan hizmetlerden cem‘ ve tahsîl ve zimmetinde kalan iki yük doksan sekiz bin iki yüz akçeyi bi’t-tamam mezbûr Hasan Bey’den ahz u kabz eyledim, bir akçe ve bir habbe bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb sebt ü ketb olundu. Fi’l-âşir min-Şevvâli’l-mükerrem li-sene erba‘a ve sittin ve elf min-hicreti men lehü’l-izzü ve’ş-şeref. Şuhûdü’l-hâl: Hasan Bey b. Ali el-mübâşir, İbrahim Çelebi b. Davud, Mehmed Çelebi b. Hüseyin, Pîrî Bey b. Hüseyin, Rıdvan b. Abdullah ve gayruhum mine’l-huzzâr.