Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 148 Hüküm no: 106 Orijinal metin no: [15b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Efendi ve hanımı Havva’ya ait olan evin Ümmügülsüm’e satıldığı Bi-imzâ-i efendi Mübâya‘a-i menzili Mahmiye-i İstanbul’da Yenibahçe kurbünde Ereğli mahallesinde sâkin olup kendi tarafından asîl ve zevcesi Havva bt. Mustafa b. Abdullah tarafından husûs-ı âti’l-beyânda vekîl olduğu zât-ı mezbûreyi ma‘rifet-i şer‘iyye ile ârifân Ahmed Efendi b. Hacı Mehmed ve Molla Numan b. İbrahim şehâdetleriyle şer‘an sâbit olan Ömer Ağa b. Mehmed meclis-i şer‘-i şerîf-i enverde sâhibetü hâzihi’l-vesîka Ümmügülsüm bt. Mustafa b. Abdullah nâm hatun tarafından husûs-ı câi’z-zikrde vekîl olduğu ber-nehc-i şer‘î sâbit olan İbrahim Efendi b. Ahmed mahzarında asâleten ve vekâleten ikrâr ve takrîr-i kelâm edip mahmiye-i İstanbul hısnı ebvâbından Cibali Yenikapısı dâhilinde Çukur mahallede vâki‘ bir tarafdan Çavuş Ali Ağa menzili ve bir tarafdan manav zevcesi menzili ve bir tarafdan Râbia Hatun menzili ve bir tarafdan tarîk-i âm ile mahdûd dâhiliyesinde tabaka-i ulyâda üç bâb oda ve vüstâda bir kilâr ve iki sagīr oda ve tahtânî bir matbah ve bi’r-i mâ ve bahçe ve köşk ve hâriciyesinde fevkānî bir oda ve tahtânî bir sagīr oda ve bir kenîf ve müştemilât-ı sâire-i ma‘lûmeyi hâvî mülk menzilin sülüsü zevcem müvekkilem mezbûre Havva’nın ve sülüsânı benim mülkümüz olmağla menzil-i mahdûd-ı mezkûrun cümlesini bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile dokuz yüz guruşa asâleten ve vekâleten mezbûre Ümmügülsüm için vekîl-i mezbûr İbrahim Efendi’ye bey‘ ve teslîm eylediğimde ol dahi ber-vech-i muharrer iştirâ ve tesellüm ve kabûl ve semeni olan meblağ-ı mezbûr dokuz yüz guruşu bana teslîm eylediğinde ben dahi yedinden bi’t-tamâm ve’l-kemâl asâleten ve vekâleten ahz u kabz edip bey‘-i mezkûrun tağrîr ve gabnine müte‘allıka âmme-i da‘vâdan müvekkile-i mezbûre Ümmügülsüm’ün zimmetini ibrâ-i âm ile bi’l-asâle ve bi’l-vekâle ibrâ ve ıskāt eyledim ba‘de’l-yevm benim ve zevcem müvekkile-i mezbûre Havva’nın aslâ alâkamız kalmayıp menzil-i mahdûd-ı mezkûr müvekkile-i merkūme Ümmügülsüm’ün mülk-i müşterâsı ve hakk-ı sırfı olmuşdur keyfe mâ teşâ ve tehtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis min-Muharremi’l-harâm sene 1153. Şuhûdü’l-hâl: el-Hâc Ömer b. İsmail, Berber Halil b. Mehmed, el-Hâc Abdullah b. Ahmed, Memiş Ağa b. Ali Bey, Hasan b. Mehmed, Mehmed b. Mehmed, Mustafa Ağa b. Ahmed