Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 149 Hüküm no: 107 Orijinal metin no: [15b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sağ veya ölü olduğu bilinmeyen Berber Ahmed’in hanımı Ayşe’ye nafaka takdiri Nafaka Mahmiye-i İstanbul’da Sofular mahallesinde sâkine bâ‘isetü’l-vesîka Âişe bt. Hasan b. Abdullah nâm hatun tarafından husûs-ı âti’z-zikre vekîl olduğu zâtını ârifân İbrahim Çelebi b. Şa‘bân ve el-Hâc Ebubekir b. Ali şehâdetleriyle sâbit olan üvey oğlu Abdurrahman b. Molla İsmail meclis-i şer‘-i hatîr-ı lâzımü’t-tevkīrde Ada-i kebîr muhârebesinde hayâtı ve memâtı ma‘lûm olmayan zevci Berber es-Seyyid Ahmed Beşe b. Abdullah’ın mâlını hıfza kıbel-i şer‘den bâ-hüccet-i şer‘iyye vasî ve kayyım nasb olunan Hasan Efendi b. Mehmed nâm kimesne mahzarında bi’l-vekâle takrîr-i kelâm ve ta‘bîr ani’l-merâm edip müvekkilem mezbûre Âişe Hatun’un mâlı olmayıp nafaka ve kisveye eşedd-i ihtiyâcı olmağla kıbel-i şer‘den mefkūd-ı mezbûr es-Seyyid Ahmed’in mâlından kadr-ı ma‘rûf nafaka ve kisve-bahâ farz ve takdîr olunmak bi’l-vekâle matlûbumdur dedikde gıbbe’t-tasdîk ve’t-tahlîfi’ş-şer‘î hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi müvekkile-i mezbûrenin nafaka ve kisve ve sâir levâzım-ı zarûriyesi’çün zevci mefkūd-ı mezbûrun vasiyy-i merkūm yedinde olan mâlından târîh-i kitâbdan yevmî üçer para farz ve takdîr buyurup meblağ-ı mefrûz-ı mezbûru kendi nafaka ve kisve ve sâir levâzım-ı zarûriyesine harc ü sarfa ve lede’l-iktizâ istidâneye ve inde’z-zafer zevci mefkūd-ı mezbûrun mâlına rücû‘a mezbûre Âişe Hatun’a izin verilmeğin mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-Zilhicceti’ş-şerîfe sene 1152. Şuhûdü’l-hâl: İbrahim Çelebi b. Şa‘bân, el-Hâc Ebubekir b. Ali, el-Hâc Mustafa b. Hacı Mehmed, Mehmed b. İbrahim