Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 149 Hüküm no: 108 Orijinal metin no: [15b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun’un eşi Ahmed’den muhâlaa yoluyla boşandığı Muhâla‘a Mahmiye-i İstanbul’da Balaban Ağa mahallesinde sâkine olup zâtı Ali b. Abdullah ve Mehmed b. Ali ta‘rîfleriyle mu‘arrefe olan Emine bt. Mustafa nâm hatun meclis-i şer‘-i hatîr-ı lâzımü’t-tevkīrde zevc-i dâhili bâ‘isü’l-kitâb Ahmed Beşe b. İbrahim nâm kimesne mahzarında ikrâr ve takrîr-i kelâm edip mezbûr Ahmed Beşe zevcim olup beynimizde hüsn-i mu‘âşeretimiz olmamağla zimmetinde mütekarrer ve ma‘kūdün-aleyh üç bin akçe mehr-i müeccelim ile nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzere mezbûr Ahmed Beşe ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete müte‘allıka âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 3 min-Muharremi’l-harâm sene 1153. Şuhûdü’l-hâl: Üsküdarî Ali b. Abdullah, Süleyman b. Ahmed, Abdullah b. Mehmed, Mehmed b. Abdullah